Aşgabatda Mençe, türkmençe! atly türkmen dili gepleşik kluby açylar
Aşgabatda Mençe, türkmençe! atly türkmen dili gepleşik kluby öz işine başlar. Klub dil endiklerini ösdürmek, söz baýlygyny giňeltmek we türkmen diliniň medeniýetini wagyz etmek maksady bilen döredildi.
Klubyň maksatnamasyna häzirki zaman meseleleri boýunça çekişmeler, tanyşdyrylyş we döredijilik çykyşlary, intellektual oýunlar, tematik duşuşyklar hem-de kino agşamlary girýär. Şeýle görnüş gatnaşyjylara aragatnaşyk endiklerini kämilleşdirmäge we türkmen dilini gündelik durmuşda has ynamly ulanmaga ýardam berer.
Kluba tejribeli mugallym we dil klublarynyň ýolbaşçysy Begenç Orazmämmedow ýolbaşçylyk eder. Guramaçylaryň bellemegine görä, sapaklar sözleýiş medeniýetini ösdürmäge, dil tejribesini artdyrmaga we türkmen dilinde janly aragatnaşyk üçin meýdança döretmäge gönükdiriler.
Ilkinji duşuşyk 20-nji iýunda sagat 17:00-da A. Seýdi köçesi, 70/1 salgysynda ýerleşýän «Aşgabat» söwda-dynç alyş merkeziniň «C» blogunyň 1-nji gatyndaky Bilelik Hub döredijilik merkezinde geçiriler.
Guramaçylar ähli isleg bildirýänleri kluba goşulmaga we türkmen dilini interaktiw görnüşde kämilleşdirmäge çagyrýarlar.
