Türkmenistanyň Döwlet çeperçilik akademiýasynda uçurymlaryň diplom işleriniň goragy geçirildi
Türkmenistanyň Döwlet çeperçilik akademiýasynda milli sungata bagyşlanan ylmy barlaglary taýýarlan uçurymlaryň diplom işleriniň üstünlikli goragy geçirildi. Ýaş sungat öwrenijiler türkmen halkynyň baý medeni mirasyny gorap saklamaga we wagyz etmäge gönükdirilen çuňňur hem-de köptaraply mowzuklary seljermek üçin saýlap aldylar. Çykyşlarynyň başynda her bir talyp öz işiniň esasy maksadyny anyk beýan etdi. Şol sebäpli gorag işi ýokary depginde geçip, temalar ähli gatnaşyjylar üçin düşnükli we elýeterli görnüşde açylyp görkezildi.
Uçurymlar nusgawy suratkeşlikden başlap, dizaýna çenli dürli ugurlary içgin öwrendiler. Mysal üçin, Aýjan Astanowa sagatlaryň taryhy we olaryň çeper bezegi barada özboluşly ylmy işi hödürledi. Serwi Gurbanberdiýewa bolsa şekillendiriş sungatynda rowaýata öwrülen ahalteke bedewiniň keşbine bagyşlanan işi bilen tanyşdyrdy. Nurana Sähetgeldiýewanyň we Sülgün Saýylowanyň işleri muzeý gymmatlyklarynyň dostluk köprüsi hökmünde ähmiýetine hem-de türkmen suratkeşliginde çaý içmek däbiniň mähirli filosofiýasyna bagyşlandy. Amangül Goçmyradowanyň albomy bolsa belli sergilerde reňk sazlaşygynyň aýratynlyklaryny açyp görkezdi.
Awtorlar ýurdumyzyň dürli sebitlerinden bolan meşhur sungat ussatlarynyň döredijilik ýoluna hem aýratyn üns berdiler. Bägül Hojanyýazowa maryly suratkeş Gurbangeldi Gurbanowyň grafika we nakgaşçylyk eserlerini giňişleýin seljerip, onuň döredijiliginde milli däpleriň gymmatyny nygtady. Sähragül Baýryýewa bolsa balkanly suratkeş Nazmämmet Satlykgulyýewiň deňiz peýzažlarynyň gözelligini açyp görkezdi. Mahym Meredowanyň işinde bolsa ussat Aýhan Hajyýewiň eserlerinde şekillendirilen türkmen şahyrlarynyň keşpleri we milli zenan lybaslarynyň inçe aýratynlyklary beýan edildi.
Ýaş alymlar tarapyndan ýerine ýetirilen bu işler täze kataloglary taýýarlamak, sergileri guramak we türkmen sungatynyň taryhyny öwrenmek üçin ygtybarly hem-de anyk gurluşly nazary binýat bolup hyzmat eder.
ORIENT
