Bilimde ýaşyl standartlar: Türkmenistanyň ýokary okuw mekdepleri ESG boýunça Ýewropa tejribesini ornaşdyrýar
Ýakynda Türkmenistanyň Döwlet energetika institutynda (TDEI) halkara okuw seminary geçirildi. Çäre Erasmus+ maksatnamasynyň «Merkezi Aziýada bilim we zähmet bazary ulgamlarynda ekologiýa meselelerini, durmuş zerurlyklaryny hem-de netijeli dolandyryşy hasaba almak» (ESGCA) atly Ýewropa taslamasynyň çäklerinde guraldy.
Duşuşygyň esasy maksady tehniki ýokary okuw mekdepleriniň mugallymlarynyň hünär derejesini ýokarlandyrmakdan we häzirki zaman ekologiýa standartlaryny okuw işine ornaşdyrmakdan ybarat boldy.
Seminara Italiýanyň Genuýa uniwersitetinden hem-de Slowakiýanyň Tehniki uniwersitetinden professorlar, şeýle-de Türkmenistanyň Döwlet energetika institutynyň mugallymlary we talyplary ýüzbe-ýüz gatnaşdylar. Türkmenistanyň beýleki tehniki ýokary okuw mekdepleriniň wekilleri bolsa ýörite guralan teleköpri arkaly çärä onlaýn görnüşde goşuldylar.
Çykyşlaryň we maslahatlaşmalaryň esasy temasy ESG (ekologiýa, durmuş jogapkärçiligi we dolandyryş) ýörelgelerini Merkezi Aziýanyň bilim ulgamyna hem-de zähmet bazaryna ornaşdyrmak boldy. Daşary ýurtly we ýerli hünärmenler häzirki zaman önümçilik we ekologik meseleleri çözmäge ukyply, zähmet bazarynda isleg bildirilýän inženerleri taýýarlamaga ýardam berjek netijeli usullary paýlaşdylar.
Ýerli ýokary okuw mekdepleriniň uçurymlary Ýewropa standartlaryna laýyk gelýän döwrebap bilimleri alýarlar. Bu bolsa olaryň häzirki zaman senagat kompaniýalarynda işe ýerleşmek mümkinçiliklerini we bäsdeşlige ukyplylygyny ep-esli ýokarlandyrýar.
ORIENT
