Türkmenistanyň söwda ministri Daşkent halkara maýa goýum forumynyň çärelerine gatnaşýar
Türkmenistanyň söwda we daşary ykdysady aragatnaşyklar ministri Nazar Agahanow Daşkent şäherinde geçirilýän V Daşkent halkara maýa goýum forumynyň çärelerine gatnaşýar.
Hususan-da, şu gün — 16-njy iýunda türkmen wekiliýetiniň ýolbaşçysy Central Asian Expo Uzbekistan halkara sergi merkeziniň işine, şeýle hem forumyň panel sessiýalaryna gatnaşýar. Saparyň maksatnamasynyň çäklerinde ministr Daşkendiň Tehnologiýa parkyna we Yslam siwilizasiýasy merkezine baryp gördi.
17-nji iýunda Nazar Agahanow Daşkent halkara maýa goýum forumynyň plenar mejlisine gatnaşar. Bu mejlis Tashkent City kongres merkezinde geçiriler.
Mundan başga-da, saparyň maksatnamasyna UzAuto Motors Powertrain we Artel Electronics kärhanalaryna baryp görmek hem girizildi. Şol ýerde türkmen wekiliýeti kompaniýalaryň önümçilik işi bilen tanyşar.
18-nji iýunda Türkmenistanyň söwda we daşary ykdysady aragatnaşyklar ministri forumyň panel sessiýalaryna gatnaşmagyny dowam etdirer. Şeýle hem, Özbegistan Respublikasynyň maýa goýumlar, senagat we söwda ministri Laziz Kudratow bilen duşuşyk meýilleşdirildi.
