Almatyda ÝB-niň we Merkezi Aziýanyň ýörite wekilleriniň duşuşygynda Owganystany üstaşyr ugurlara işjeň çekmek meseleleri maslahatlaşyldy
ORIENT | Syýasat. 15-nji iýunda Almatyda geçirilen Ýewropa Bileleşiginiň we Merkezi Aziýa döwletleriniň Owganystan boýunça ýörite wekilleriniň we ýörite ynanylan wekilleriniň 8-nji duşuşygynda sebit howpsuzlygyny üpjün etmegiň hem-de inklyuziw ykdysady ösüşiň iň möhüm meseleleri esasy mowzuklar boldy. Bu wekilçilikli köptaraply duşuşyga Daşary işler ministriniň orunbasary Ahmet Gurbanowyň ýolbaşçylygyndaky Türkmenistanyň wekiliýeti, şeýle hem Gazagystanyň, Gyrgyzystanyň, Täjigistanyň, Özbegistanyň, Ýewropa Bileleşiginiň we Birleşen Milletler Guramasynyň ygtyýarly wekilleri gatnaşdy.
Konstruktiw çekişmeleriň dowamynda diplomatlar Owganystandaky ýagdaýlaryň ösüşiniň möhüm ugurlary boýunça giňişleýin pikir alyşdylar. Olar bu ýagdaýyň sebitiň umumy durnuklylygyna ýetirýän göni täsirini jikme-jik seljerdiler we halkara hyzmatdaşlygy giňeltmegiň esasy geljekki ugurlaryny kesgitlediler.
Almaty duşuşygynda maslahatlaşylan esasy we iň iş ýüzündäki ugurlaryň biri hem Owganystanyň çäklerinden geçýän ulag-logistika we üstaşyr geçelgeleriniň gerimini giňeltmek arkaly sebitara integrasiýany güýçlendirmek boldy. Maslahata gatnaşyjylar bu ýollaryň gaýtadan dikeldilmeginiň we döwrebaplaşdyrylmagynyň Merkezi we Günorta Aziýa ýurtlarynyň arasyndaky söwda-ykdysady hyzmatdaşlygy giňeltmekde güýçli itergi bolup biljekdigi, şeýle hem Ýewropa Bileleşigi bilen yklymara gatnaşyklary berkitmekde ygtybarly köpri bolup hyzmat etjekdigi barada birmeňzeş pikire geldiler. Bu ugurda ilata ynsanperwer kömegini bermekde, ýurduň durmuş-ykdysady taýdan gaýtadan dikelmegine ýardam etmekde, institutlary berkitmekde we Durnukly ösüş maksatlaryna ýetmekde BMG-niň hem-de onuň ýöriteleşdirilen gurluşlarynyň ýokary utgaşdyryjylyk wezipesi aýratyn bellenildi.
Daşary ýurtly kärdeşleriniň öňünde çykyş edip, Türkmenistanyň Daşary işler ministriniň orunbasary Ahmet Gurbanow resmi Aşgabadynyň yzygiderli, parahatçylyk söýüji we döredijilikli garaýşyny jikme-jik beýan etdi. Türkmenistanyň owgan topragynda durnukly parahatçylygyň we ykdysady durnuklylygynyň gazanylmagynyň tarapdary bolup çykyş edýändigi, goňşy döwlete esasy sebitara integrasiýa işleriniň doly hukukly we örän möhüm gatnaşyjysy hökmünde garaýandygy aňyk mälim edildi.
Biziň ýurdumyz goňşularyna elektrik energiýasyny we ynsanperwer ýüklerini ibermek, şeýle hem iň iri serhetüsti infrastruktura taslamalary amala aşyrmak arkaly köp ýyllaryň dowamynda bu ygrarlylygyny iş ýüzünde subut edip gelýär. Türkmen tarapy Owganystanyň ählumumy howpsuzlygyny, uzak möhletli abadançylygyny we durnukly ösüşini üpjün etmek ugrunda sebitiň ähli döwletleri, Ýewropa Bileleşiginiň gurluşlary we halkara institutlary bilen işjeň hyzmatdaşlygy dowam etdirmäge doly taýýardygyny tassyklady.
