Türkmenistanyň raýaty Ýewropanyň iň beýik depesine üstünlikli çykyşyny amala aşyrdy
Türkmenistanyň raýaty Wanessa Murtazina Elbrus dagyna günorta ugur boýunça üstünlikli çykdy. Ol öz gazanan üstünligi barada redaksiýa habar berip, ekspedisiýa bilen bagly suratlary we maglumatlary paýlaşdy.
Wanessanyň aýtmagyna görä, bu çykyş onuň üçin möhüm şahsy üstünlik bolup, çynlakaý taýýarlygy, çydamlylygy we tutanýerliligi talap etdi. Ol depä barýan ýoluň diňe bir fiziki synag bolman, eýsem ýatdan çykmajak täsirleriň we täze tejribeleriň çeşmesi bolandygyny belledi.
«Bu meniň üçin aýratyn tejribe boldy. Ol sporta, syýahata we daglara bolan söýgimi has-da güýçlendirdi» diýip, Wanessa gürrüň berdi.
Elbrus, Kawkaz daglarynda ýerleşip, Russiýanyň we Ýewropanyň iň beýik dag depesidir. Her ýyl müňlerçe alpinist we işjeň dynç alyşy halaýan adamlar dürli ugurlar boýunça onuň depelerine çykýarlar.
