Hytaý we türkmen alymlary Garagumda giň gerimli ylmy ekspedisiýany tamamladylar
Türkmen we hytaý alymlary Türkmenistanyň birnäçe goralýan tebigy çäklerini öz içine alan toplumlaýyn çöl öwreniş ekspedisiýasyny üstünlikli tamamladylar. Ylmy barlaglar Türkmenistanyň Daşky gurşawy goramak ministrliginiň Çöller, ösümlik we haýwanat dünýäsi milli instituty bilen Hytaý Ylymlar akademiýasynyň Sinszýan ekologiýa we geografiýa institutynyň bilelikde guramagynda geçirildi.
Ekspedisiýanyň dowamynda hünärmenler Merkezi Garagumdaky «Garryköl» ylmy stansiýasyny, Bokurdak we Ýerbent etraplaryny, Darwaza gaz kraterini, şeýle hem Gaplaňgyr döwlet tebigy goraghanasyny, «Bereketli Garagum» tebigy çägini we Repetek biosfera goraghanasyny gözden geçirdiler.
Gatnaşyjylar geobotaniki barlaglary, haýwanat dünýäsiniň monitoringini geçirdiler, toprak nusgalaryny ýygnadylar hem-de çölleşme hadysalaryny öwrenmek üçin ýörite synag meýdançalaryny döretdiler. Repetek biosfera goraghanasynda alymlar ylmy infrastruktura, gerbariý ýygyndysy we aýratyn goralýan tebigy çägiň tebigy desgalary bilen tanyşdylar.
Ekspedisiýanyň dowamynda toplanan maglumatlar Türkmenistanyň Gyzyl kitabynyň täze neşirini hem-de çöl ösümlikleriniň atlasyny taýýarlamakda ulanylar. Hytaý hünärmenleri bolsa alnan maglumatlary Garagumyň landşaftlaryny öwrenmekde we Garagum bilen Takla-Makan çölleriniň deňeşdirme seljermesini geçirmekde peýdalanmagy meýilleşdirýärler.
