Türkmenistanda gender deňligi boýunça täze bäş ýyllyk meýilnama tassyklanyldy
ORIENT | Jemgyýet. Türkmenistanyň Prezidenti “Türkmenistanda gender deňligi boýunça 2026 — 2030-njy ýyllar üçin Hereketleriň milli meýilnamasyny” tassyklaýan Karara gol çekdi. Täze resminama ýurtda erkekleriň we aýallaryň durmuş-ykdysady, jemgyýetçilik-syýasy hem-de medeni-ynsanperwer işlere deň derejede gatnaşmagyny has-da ýaýbaňlandyrmak üçin esasy gural bolar. Meýilnamada bellenilen çäreleriň ýerine ýetirilmegini üpjün etmek ähli ministrlere, pudaklaýyn dolandyryş edaralaryna, şeýle hem ýerine ýetiriji häkimiýetiň ýerli edaralaryna we öz-özüni dolandyryş edaralaryna tabşyryldy diýip, TDH habar berýär.
Iş ýüzünde bu, zenanlaryň telekeçiligini goldamak maksatnamalarynyň mundan beýläk-de ösdürilmegini, ýokary hilli bilime, döwrebap tehnologiýalara, lukmançylyga we döwlet dolandyryşyna deň elýeterliligiň üpjün edilmegini, şeýle hem zähmet bazaryndaky islendik päsgelçilikleriň aradan aýrylmagyny aňladýar.
Resminamada halkara ugruna aýratyn ähmiýet berilýär. 2030-njy ýyla çenli täze meýilnamanyň kabul edilmegi Türkmenistanyň BMG-niň ählumumy konwensiýalarynyň we şertnamalarynyň çägindäki öz borçnamalaryna yzygiderli ygrarlydygyny tassyklaýar. Ýurt diňe bir hukuklaryň deňligini yglan etmek bilen çäklenmän, eýsem, bu ýörelgeleriň hakyky durmuşda işlemegi üçin anyk hukuk we amaly binýady döredýär.
Bu resminama adam hukuklary we durmuş deňligi ulgamyndaky ozalky döwlet maksatnamalarynyň logiki dowamydyr. Gender çemeleşmesiniň milli ykdysady taslamalara ornaşdyrylmagy Türkmenistana diňe bir öz durmuş ugurly maýasyny berkitmäge däl, eýsem, durnukly ösüş babatyndaky halkara reýtinglerini ýokarlandyrmaga-da mümkinçilik berer.
