Nyşanyny ýitirmeýän şöhle: Hytaý hereket edýän desgalary Günüň energiýasy bilen üpjün etmegi başardy
100 metr aralykda 1180 watt kuwwat, 20,8 göterim peýdaly täsir koeffisiýenti we 88 göterim şöhle kabul ediş takyklygy — «Çžuri» taslamasy «birden-bire» ulgamyndan «birden-köpe» dinamiki energiýa geçirişine geçdi
Bu barada CCTV+ tarapyndan taýýarlanan reportažda aýdylýar.
Hytaýyň Şensi welaýatyndaky Sidýan uniwersitetiniň ýolbaşçylygyndaky «Günüň yzyndan kowalaşmak» taslamasy möhüm ylmy üstünlik gazandy. Dünýäde ilkinji gezek energiýany bir wagtda birnäçe çalt hereket edýän nyşana geçirmek başardyldy.
Öň ulgam diňe kesgitli «birden-bire» görnüşinde işleýärdi. Indi bolsa energiýa «birden-köpe» görnüşinde dinamiki geçirilýär. Şöhle nyşanlary özbaşdak tapýar we olaryň hereket edýändigine garamazdan ugruny ýitirmeýär.
Dosent Sýan Sihaonyň düşündirmegine görä, esasy kynçylyk hereket edýän nyşanyň üstünde şöhläni signal ýitgisine ýol bermezden saklamakdy. Alymlar munuň üçin ýokary takyklykly ters aragatnaşyk ulgamyny işläp taýýarladylar. Kabul ediji antenna signal iberýär, geçiriji bolsa nyşany dessine kesgitleýär we onuň ýerleşýän ornuny hasaplaýar.
Şöhleleriň näsazlyk ýüze çykan ýagdaýynda zyýan ýetirmezligi üçin ulgamyň esasy bölekleri galiý nitridinden öndürilen diodlar bilen üpjün edildi. Olar kuwwatyň güýçli üýtgemelerine çydamlydyr.
Meýdan synaglary ulgamyň netijeliligini tassyklady. 100 metr aralykda ulgam 1180 watt kuwwat berýär. Bu bolsa kondisioneri işletmek, nahar taýýarlamak ýa-da suw gaýnatmak üçin ýeterlikdir. Üznüksiz toguň geçirilmeginiň peýdaly täsir koeffisiýenti 20,8 göterime, şöhläni kabul etmegiň netijeliligi bolsa 88 göterime ýetdi.
«Çžuri» («Günüň yzyndan kowalaşmak») taslamasy 2022-nji ýylda Hytaýyň demirgazyk-günbataryndaky Şensi welaýatynda ýerleşýän Sidýan uniwersiteti tarapyndan işe girizildi. Taslamanyň esasy maksady geljekde kosmosdaky Gün elektrik stansiýalaryndan energiýany Ýere ýa-da kosmos enjamlaryna şöhle arkaly geçirmekdir.
Adamzat hemişe Güne ymtylyp geldi — ilki miflerde, soňra ylmy gözleglerde. Häzirki wagtda bolsa biz diňe «Günüň yzyndan kowalaşmak» bilen çäklenmän, onuň energiýasyny hereket halatynda hem kabul etmegi öwrenýäris. Kosmosdan başlan şöhläniň Ýerdäki hereket edýän nyşana takyk ýetýän güni adamzadyň baky arzuwyna — durmuş beren ýyldyzdan göni güýç almak maksadyna ýene bir ädim ýakynlaşandygyny aňladar.
