Aşgabatda Türkmenistanyň Halkara Pul Gaznasynyň wekiliýeti bilen geňeşmeleri başlandy
ORIENT | Ykdysadyýet, 8-nji iýun. Türkmenistanyň DIM-de Daşary işler ministriniň orunbasary Serdar Muhammetdurdyýew bilen Anna Rouz Bordonyň ýolbaşçylygyndaky Halkara Pul Gaznasynyň (HPG) wekiliýetiniň arasynda duşuşyk geçirildi. Bilermenler HPG-niň Ylalaşygynyň IV maddasyna laýyklykda geçirilýän adaty maslahatlar missiýasynyň çäklerinde Aşgabada geldiler.
Gepleşikleriň dowamynda taraplar hyzmatdaşlygyň häzirki ýagdaýyny we geljegini jikme-jik seljerdiler. Şunda makroykdysady syýasatyň esasy ugurlaryna, Türkmenistanyň maliýe ulgamynyň durnuklylygyna we ählumumy ykdysady töwekgelçilikleri azaltmak boýunça görülýän çärelere aýratyn üns berildi diýip, ýurduň DIM-de habar berildi.
Söhbetdeşligiň esasy ugurlarynyň biri hem sebit ykdysadyýetine täsir edýän daşky faktorlaryň seljermesi boldy. Bu nukdaýnazardan, HPG-niň wekilleri Aşgabadyň milli ykdysadyýeti goramak üçin ädimleriniň wagtynda ädilendigini we örän möhümdigini bellediler. Bu ýerde gürrüň eksport ugurlarynyň yzygiderli diwersifikasiýalaşdyrylmagy, ulag-logistika infrastrukturasynyň giň gerimli döwrebaplaşdyrylmagy we içerki serişdeleriň netijeli ulanylmagy barada barýar.
Ykdysatçylar Türkmenistanyň dünýä söwda ulgamyna goşulmak prosesine we Bütindünýä Söwda Guramasyna (BSG) agza bolmak boýunça alnyp barylýan taýýarlyk işlerine aýratyn üns berdiler. HPG-niň wekiliýeti türkmen tarapynyň milli kanunçylygy halkara standartlaryna laýyk getirmek boýunça amala aşyrýan toplumlaýyn işlerine, şeýle hem döwlet statistika ulgamynyň döwrebaplaşdyrylmagyna ýokary baha berdi.
Duşuşygyň netijeleri boýunça taraplar işjeň gatnaşyklary dowam etdirmäge taýýardyklaryny tassykladylar. HPG-niň häzirki missiýasynyň netijeleriniň we teklipleriniň ykdysady durnuklylygy berkitmäge hem-de sebitde abadançylygyň mundan beýläk-de ösmegine ýardam etjekdigine garaşylýar.
