Gurluşykda 3D çap tehnologiýasy: Fransiýada 34 günde 12 öýli ýaşaýyş jaýy çap edildi
Fransiýada beton 3D çap tehnologiýasy arkaly gurlan Ýewropanyň iň uly köp öýli ýaşaýyş jaýynyň gurluşygy tamamlandy. Täsin bina doly derejeli 12 öýden ybarat bolup, olary durmuş ýaşaýyş jaýy hökmünde ulanmaga meýilleşdirilýär. Bu taslama innowasion tehnologiýalaryň ýokary hilli gozgalmaýan emlägiň gurluşygyny düýpli tizleşdirip bilýändigini amaly taýdan subut etdi.
Täze tehnologiýanyň esasy artykmaçlygy onuň örän ýokary tizligidir. Jaýyň esasy gurluş konstruksiýasyny gurmak üçin bary-ýogy 34 iş güni gerek boldy. Şol bir wagtyň özünde gurluşyk meýdançasynda ähli işleri dolandyrmak üçin diňe üç operatoryň gatnaşmagy ýeterlik boldy. Deňeşdirmek üçin, şol bir wagtda adaty usullar bilen gurulýan goňşy bina üç aý töweregi gijä galyp tamamlandy. Şeýlelikde, awtomatlaşdyryş gurluşyk kompaniýalaryna wagty tygşytlamaga we zähmet serişdelerini has netijeli peýdalanmaga mümkinçilik berýär.
Ýokary tehnologiýaly ýaşaýyş jaýynyň taslamasyny birnäçe hünärmenlerden ybarat topar amala aşyrdy. Binanyň binagärlik konsepsiýasy Plurial Novilia gurluşyk kompaniýasy we HOBO Architecture binagärlik býurosy tarapyndan işlenip düzüldi. Gurluşygyň 3D çap işlerini bolsa PERI 3D Construction kompaniýasynyň hünärmenleri ýerine ýetirdiler. Diwarlary döretmek üçin olar häzirki zaman robotlaşdyrylan gurluşyk enjamy bolan COBOD BOD2 ulgamyndan peýdalandylar.
Bu taslamanyň üstünlikli durmuşa geçirilmegi dünýäniň gurluşyk pudagy üçin täze mümkinçilikleri açýar. Gurluşyk 3D printerleriniň ulanylmagy birbada üç möhüm meseläni çözmäge kömek edýär: gurluşyk möhletlerini gysgaldýar, zähmet çykdajylaryny azaldýar we ýaşaýyş jaýyna mätäç adamlar üçin elýeterli durmuş ýaşaýyş jaýlaryny çalt gurmaga mümkinçilik berýär.
ORIENT
