Tramp alýuminiý, polat we mis boýunça gümrük paçlaryny düzetmek hakynda permana gol çekdi
Duşenbe güni ABŞ-nyň Prezidenti Donald Tramp 1962-nji ýylyň Söwdany giňeltmek hakynda Kanunynyň 232-nji bölümi esasynda alýuminiý, polat we mis önümleriniň käbir import görnüşlerine degişli gümrük paçlaryna üýtgetmeler girizmek hakynda permana gol çekdi. Bu barada Ak tamyň metbugat gullugy habar berdi.
Ak tamyň maglumat sahypasyna görä, täze perman oba hojalyk tehnikalaryna, şol sanda kombaýnlara we orak ulaglaryna, şeýle hem käbir beýleki enjamlara degişli gümrük paçlaryny 25 göterimden 15 göterime çenli peseldýär.
Şeýle hem perman 15 göterimlik paç bilen salgyt salynýan senagat enjamlarynyň sanawyny giňeldip, buldozerler, awtoýük göterijiler ýaly göçme senagat tehnikalaryny hem öz içine alýar.
Mundan başga-da, import edilýän önümleriň ABŞ-da öndürilen alýuminiden, polatdan ýa-da misden «doly» taýýarlanan hasaplanmagy üçin zerur bolan paý 95 göterimden 85 göterime çenli peseldildi. Şeýlelikde, 2-nji aprelde kabul edilen polat, alýuminiý we mis boýunça gümrük paçlary baradaky perman bilen girizilen talaplar ýeňilleşdirildi.
Täze perman daşary ýurt kompaniýalaryny ABŞ-da öndürilen polat we alýuminini has köp ulanmaga höweslendirýär. Oňa laýyklykda, eger kompaniýanyň maýa enjamlary agramy boýunça azyndan 85 göterim ABŞ-da eredilip-guýlan polatdan ýa-da alýuminiden ybarat bolsa, olar 10 göterimlik gümrük paç derejesinden peýdalanyp bilerler.
Ak tamyň metbugat gullugynyň habar bermegine görä, bu üýtgetmeler 8-nji iýundan güýje girer we 2027-nji ýylyň 31-nji dekabryna çenli hereket eder.
2018-nji ýylda, ilkinji prezidentlik möhletinde Donald Tramp 1962-nji ýylyň Söwdany giňeltmek hakynda Kanunynyň 232-nji bölümini ulanyp, polat we alýuminiý importyna gümrük paçlaryny girizipdi. 2025-nji ýylda Ak tama gaýdyp geleninden soň, ol öňki ABŞ administrasiýasy tarapyndan girizilen polat we alýuminiý paçlaryny täzeden gözden geçirdi hem-de mis importyna gümrük paçlaryny girizdi.
