Türkmenistanly ýaş hünärmenler halkara bäsleşiginde iň gowy gatnaşyjylaryň hataryna girdi
Türkmenistanyň Bilim ministrliginiň ýaşlar wekiliýeti Hatlon welaýatynda geçirilen abraýly «International Skills Forum Tajikistan – 2026» halkara forumynda we iş hünärleri bäsleşiginde üstünlikli çykyş etdi. Dört günüň dowamynda gurluşyk, energetika we tehniki ugurlaryň zehinli wekilleri Merkezi Aziýa ýurtlaryndan, Hytaýdan we Türkiýeden gelen güýçli gatnaşyjylar bilen deň derejede öz amaly başarnyklaryny görkezdiler.
Bäsleşigiň amaly tapgyrynda gatnaşyjylar takyklyk, tiz ýerine ýetiriş, tehniki sowatlylyk hem-de howpsuzlyk düzgünleriniň berk berjaý edilmegi boýunça çylşyrymly synaglardan geçdiler. 4–6 sagadyň dowamynda ýaş hünärmenler elektrik tehnikasy, suwagçylyk işleri, elektrik-gaz kebşirlemesi we alternatiw energiýa enjamlaryny sazlamak boýunça tabşyryklary ýerine ýetirdiler. Ýerine ýetirilen işleriň hili halkara bilermenleriniň garaşsyz topary tarapyndan WorldSkills hereketiniň ülňülerine ýakyn ölçegler esasynda bahalandyryldy.
Bäsleşigiň netijeleri boýunça Türkmenistanyň Gurluşyk we binagärlik ministrliginiň Aşgabat gurluşyk orta hünär okuw mekdebiniň talyby Nepes Rahmanberdiýew ýokary ussatlyk görkezip, hormatly 2-nji orna mynasyp boldy. Ýurdumyzyň başga bir wekili, Türkmenistanyň Energetika ministrliginiň Aşgabat energetika orta hünär okuw mekdebiniň diňleýjisi Ymamberdi Söhbetow bolsa örän güýçli bäsdeşlik şertlerinde forumyň iň güýçli dört ýaş hünärmeniniň hataryna girmegi başardy.
Bäsleşik maksatnamasyndan başga-da, türkmen wekilleri ugurdaş maslahatlaşmalara gatnaşdylar hem-de Nurek gidroelektrik stansiýasyna baryp gördüler. Bu sapar ýaşlara iri energetika desgalarynyň işiniň gerimini öz gözleri bilen görmäge mümkinçilik berdi. Halkara derejede gazanylan ýokary netijeler ýurdumyzyň hünär-tehniki bilim ulgamynyň dünýäniň iň ýokary talaplaryna laýyklykda işlemäge ukyply, bäsdeşlige ukyply hünärmenleri taýýarlaýandygyny tassyklaýar.
ORIENT
