Türkmenistan bilen OpenAI Londondaky forumda ChatGPT-niň bilim ulgamyna ornaşdyrylmagyny ara alyp maslahatlaşdy
Türkmenistanyň Bilim ministrliginiň wekiliýeti Londonda geçirilen Bütindünýä bilim forumynyň (EWF 2026) çäklerinde dünýäniň öňdebaryjy IT kompaniýalary we halkara institutlary bilen giň gerimli gepleşikleri geçirdi. Bu barada Türkmenistanyň Bilim ministrliginiň resmi saýtynda habar berildi.
Duşuşyklaryň esasy mowzugy emeli aňy (AI), sanly platformalary we öňdebaryjy dolandyryş standartlaryny ýurdumyzyň bilim edaralaryna amaly taýdan ornaşdyrmak boldy. Maksat bilim ulgamyny häzirki zaman zähmet bazarynyň talaplaryna uýgunlaşdyrmakdan ybaratdyr.
OpenAI amerikan kompaniýasynyň wekilleri bilen geçirilen iş duşuşygynda ChatGPT EDU neýroulgamynyň aýratyn orta we ýokary okuw mekdeplerinde synag görnüşinde işe girizilmeginiň mümkinçilikleri giňişleýin ara alnyp maslahatlaşyldy. Taraplar emeli aňyň mugallymy çalyşmaly däldigi, eýsem okuw prosesini goldaýan we şahsylaşdyrýan gural hökmünde çykyş etmelidigi baradaky pikire geldiler.
Şeýle hem maglumatlaryň goragy, akademiki dogruçyllyk we mugallymlaryň AI sowatlylygyny ýokarlandyrmak meselelerine aýratyn üns berildi. Geljekki taslamalara tehnologiýalaryň okuwçylaryň özbaşdaklygyna nähili täsir edýändigini öwrenmek üçin hökmany ylmy-barlag bölegini goşmak meýilleşdirilýär. Mundan başga-da, ýaşlaryň amaly başarnyklaryny ösdürmek maksady bilen talyplar üçin AI-hakatonlaryny guramak göz öňünde tutulýar.
Neýroulgamlaryň ornaşdyrylmagy milli sanly ekoulgamyň ösüşi bilen gönüden-göni baglanyşdyrylar. Effecta we Matific kompaniýalary bilen bilelikde iňlis dili we matematika boýunça şahsy AI-týutorlar öwrenildi. Bu ulgamlar çagalaryň bilimindäki boşluklary awtomatik kesgitlemäge we olara aýratyn tabşyryklary hödürlemäge ukyplydyr.
Okuw görkezijileri, gatnaşygy we okuw ýüki baradaky maglumatlar seljeriş binýadyny emele getirer. Bu maglumatlar ministrlige dolandyryş çözgütlerini has takyk kabul etmäge hem-de hakyky maglumatlaryň esasynda hünär ugrukdyrma işlerini netijeli ösdürmäge kömek eder.
Dolandyryş mümkinçiliklerini pugtalandyrmak ugrunda Project Management Institute (PMI) we Education Development Trust gaznasynyň bilermenleri bilen geçirilen gepleşikler möhüm ädim boldy. PMI-niň halkara tejribesini taslama ofislerini, ýol kartalaryny we özgertmeleriň töwekgelçiliklerine baha bermek ulgamlaryny döretmekde ulanmak meýilleşdirilýär. Beýik Britaniýanyň usullary bolsa mekdep ýolbaşçylygyny ösdürmäge we direktorlaryň hünär derejesini ýokarlandyrmaga ýardam eder. Ýakyn wagtda hyzmatdaşlygyň hakyky meýilnamalaryny taýýarlamak üçin taraplar birnäçe tehniki onlaýn maslahatlaryny geçirerler.
ORIENT
