Seresap boluň, zehin bilen bezelen! Bäşim Nuraly adyndaky mekdebiň ýyllyk sergisi nähili geçdi
Türkmenistanyň Suratkeşler birleşiginiň sergi zalynda Aşgabatdaky Bäşim Nuraly adyndaky çeperçilik mekdebiniň okuwçylarynyň eserleriniň giň gerimli sergisi geçirildi. Bu çäre milli sungatyň geljeginiň özboluşly syny hökmünde uly täsir galdyrdy. Sergi zalynyň ähli giňişligini eýelän ekspozisiýa tomaşaçylara okuw ýylynyň täsirli netijelerini görkezdi.
Ýaş suratkeşleriň döredijilik işjeňligi iň uly garaşylýan netijelerden hem ýokary boldy. Eserleriň sany we iň esasysy, olaryň ýokary hili mekdepde örän çynlakaý we yhlasly iş alnyp barylýandygynyň aýdyň subutnamasyna öwrüldi.
Sergi ýörite geljekki ussatlaryň özleşdirýän ähli žanrlaryny we usullaryny açyp görkezmek üçin guralypdyr. Bu ýerde türkmen tebigatynyň inçe öwüşginlerini şöhlelendirýän peýzažlar, täsirli portretler hem-de jikme-jik işlenen natýurmortlar bir ýere jemlenipdir. Açyk hem näzik akwarelden, reňkli guaşdan başlap, kömür, syýa we galam bilen ýerine ýetirilen grafika çenli dürli usullaryň ulanylmagy okuwçylaryň berk akademiki taýýarlygyny görkezýärdi. Myhmanlaryň aýratyn ünsüni ýagly boýag bilen çekilen eserler özüne çekdi. Olarda gurallaryň batyrgaý hereketleri we reňk bilen işlemegiň çynlakaý çemeleşmesi duýulýardy.
Bäşim Nuraly adyndaky Çagalar çeperçilik mekdebiniň müdiri Öwezgeldi Ýagmyrow çykyş edip, şu ýylky serginiň çagalar üçin döredijilik taýdan özboluşly kämillik synagyna öwrülendigini aýtdy. Onuň bellemegine görä, her bir eseriň aňyrsynda diňe birnäçe sagatlap edilen türgenleşik däl, eýsem şahsy döredijilik ýoluny gözlemek hem bar. Mugallymlar diňe bir tehniki başarnyklary öwretmek bilen çäklenmän, eýsem gündelik durmuşdaky gözelligi duýmagy, milli däpleri we çaga ýüreginiň päkligini saklamagy hem öwredýärler.
Sergä gelenler eserleri uly gyzyklanma bilen synladylar. Her diwaryň öňünde uzak wagtlap saklanyp, ähli işleri jikme-jik görmek üçin birnäçe gezek aýlanmaly boldular. Eserleriň sany şeýle köpdi welin, tomaşaçylaryň gözi gamaşýardy. Hakykatdan hem, 2025–2026-njy okuw ýyly döredijilik işleri taýdan örän bereketli ýyl boldy.
Myhmanlaryň aýratyn haýran galmagyna amaly-haşam sungaty bölümi sebäp boldy. Okuwçylaryň döreden gobelenleri nagyşlarynyň sazlaşygy we çylşyrymly dokalyşy bilen tapawutlandy. Şeýle sungat örän uly sabyrlylygy talap edýär, ýaş ussatlar muny üstünlikli görkezmegi başardylar. Şeýle hem zergärçilik bölüminiň işleri uly gyzyklanma döretdi. Metalyň inçelik bilen işlenmegi, däp bolan usullaryň hem-de nagyş oýmak sungatynyň ulanylmagy türkmen zergärçilik sungatyndaky nesilleriň dowamlylygyny açyp görkezdi.
Serginiň dabaraly açylyşyny «Sungatlaryň çatrygy» taslamasynyň guramagynda ýerine ýetirilen sazly çykyşlar has-da baýlaşdyrdy. Zal giňişliginde Elman Nasyrowyň ýolbaşçylygyndaky kirişli saz gurallarynuň kwartetiniň sazlary ýaňlanyp, surat eserlerini synlamak üçin aýratyn sazlaşykly ýagdaý döredildi. Aýdymçy Begenç Moşiýew öz çykyşy bilen çärä duýgy taýdan aýratyn öwüşgin berdi. «Sungatlaryň çatrygy» taslamasynyň esaslandyryjysy, kompozitor, žurnalist we saz öwreniji Aýna Şirowa dürli sungat görnüşleriniň sazlaşygynyň möhümdigini ýene bir gezek görkezdi. Şol agşam saz bilen surat sungaty biri-biriniň dolduryp, bitewi estetik giňişligi döretdi.
Çärä türkmen sungatynyň şöhratyny dünýä ýaýýan görnükli medeniýet işgärleri hem gatnaşdylar. Halk suratkeşleriniň gatnaşmagy ýaş döredijiler üçin uly goldaw boldy. Sungat ussatlary eserleri üns bilen synlap, olarda uly zehiniň we hünär batyrlygynyň ilkinji alamatlaryny gördüler. Şeýle-de sergä ýazyjylar, kompozitorlar, aktýorlar, režissýorlar, sazandalar hem-de döredijilik ýokary okuw mekdepleriniň mugallymlary gatnaşdylar.
Çäre köpçülikleýin habar beriş serişdeleriniň uly ünsüni çekdi. Merkezi neşirleriň žurnalistleri we telewideniýäniň surata düşüriş toparlary zalyň içinde iş alyp baryp, bilermenleriň pikirlerini we tomaşaçylaryň ilkinji täsirlerini ýazga geçirdiler. Tolgunýan hem bolsa, öz eserleri barada höwes bilen gürrüň beren ýaş suratkeşler bilen geçirilen söhbetdeşlikler geljekki reportažlaryň esasy boldy. Kameralaryň we fotoapparatlaryň köp bolmagy bu wakanyň paýtagtymyzyň medeni durmuşyndaky ähmiýetini görkezdi.
Çäräniň dowamynda aýratyn tapawutlanan ýaş suratkeşlere we olaryň halypalaryna diplomlar, hormat hatlary hem-de sowgatlar gowşuryldy. Myhmanlar mikrofona çykyp, bu giň gerimli serginiň guramaçylaryny gutlap çykyş etdiler.
Aýdylşy ýaly, gowy çarçuwa suratyň gözelligini tamamlaýar. Emma Bäşim Nuraly adyndaky mekdebiň okuwçylarynyň sergisinde tomaşaçylar başga bir hakykaty gördüler: suratlar çarçuwanyň içinde ýerleşdirilen hem bolsa, ýaş “nuralyýewlylaryň” döredijilik hyýaly hiç hili çäk bilen çäklendirilmeýär.
Sergi köp sanly oňyn seslenme döretdi. Myhmanlar we hünärmenler eserleriň ýokary ussatlygy, tematik dürlüligi hem-de täzeçe pikirleri barada biragyzdan bellediler. Bäşim Nuraly adyndaky mekdebiň okuwçylary ýene bir gezek diňe hakykaty şekillendirmän, eýsem oňa çeperçilik serişdeleriniň baý mümkinçilikleri arkaly çuňňur many bermäge çalyşýandyklaryny subut etdiler. Bu sergi diňe bir uzak zähmetiň netijesi bolman, eýsem onuň her bir gatnaşyjysy üçin hünär taýdan ösüşiň möhüm basgançagyna öwrüldi.
Aýna Ýolbarsowa
