“Sanly ekizler” şäherleri has akylly we howpsyz edýär: geljegiň tehnologiýasy Sindao şäherinde nähili işleýär
Dronlaryň we emeli aňyň kömegi bilen inženerler töwekgelçilikleri öňünden çaklamak üçin köpürleriň we binalaryň wirtual nusgalaryny döredýärler.
“CCTV+” habarlar gullugynyň berýän maglumatyna görä, Şandun welaýatynyň kenarýaka şäheri bolan Sindao ýokary tehnologiýaly “sanly ekizler” (digital twin) tehnologiýasyny — şäher giňişlikleriniň wirtual nusgalaryny döretmegi ornaşdyrýar. Bu bolsa häkimiýetlere ähtimal töwekgelçilikleri öňünden çaklamak we infrastrukturany kämilleşdirmek arkaly howpsuzlygy ýokarlandyrmaga kömek edýär.
Şäherler ulaldygyça, “sanly ekizler” şäher gurluşykçylaryna täze kynçylyklary ýenip geçmäge kömek edýär. Inženerler şäher landşaftlarynyň sanly modellerini döretmek üçin hakyky wagt tertibindäki maglumatlary we emeli aňy ulanýarlar. Köplenç munuň üçin dronlar ulanylýar; olar ýerleri ýokardan gözden geçirip, binalaryň we infrastrukturanyň takyk şekilini emele getirýärler.
“Hainayun” kompaniýasynyň (“Haier” kompaniýasynyň düzümine girýän kärhana) baş arhitektory Çžu Ýuanliniň aýtmagyna görä, sanly ekiz tehnologiýasy aýry-aýry etraplardan başlap, tutuş şäher ulgamlaryna çenli hemme zady öz içine alyp bilýär. Ýaňy-ýakynda onuň topary dronuň kömegi bilen Sindaodaky köpür baradaky möhüm maglumatlary ýygnady.
“Köpürler üçin örän howply iki ýagdaý bar. Birinjisi — göterijilik ukybynyň ýetersizligi, bu onuň çökmegine getirip biler. Ikinjisi — agmalyk töwekgelçiligi. Şonuň üçin hem bize ähli degişli maglumatlary ýygnamak zerurdyr” diýip, ol düşündirdi.
Sindao şäheriniň gozgalmaýan emlägini dolandyryş maglumat merkeziniň direktorynyň orunbasary Li Kaý “Howp duýduryşy berlen badyna, irki duýduryş ulgamy işe girizilýär we biz köpür gurluşyny gaýtadan barlamak üçin degişli işgärleri şol ýere ugradýarys” diýip belledi.
Çžunyň aýtmagyna görä, sanly ekiz inženeri hünäri barha uly islege eýe bolýar. Ol üç derejeli gurluşy suratlandyrdy: birinji tapgyrda inženerler modelirlemek bilen meşgullanýarlar, ikinji tapgyrda maglumatlary utgaşdyrmak we seljermek, üçünji tapgyrda bolsa sanly ekizleriň kömegi bilen çaklama hünärmenleri bolup ýetişýärler.
Sanly ekizler diňe bir köpürler üçin däl, eýsem suw üpjünçiligine gözegçilik etmekde, zeýkeş ulgamlaryny dolandyrmakda we gaz syzmalarynyň öňüni almakda hem ulanylýar. Hytaýda sanly ekiz çözgütleriniň bazary 2020-nji ýyldaky 4 milliard ýuandan 2024-nji ýylda tas 15 milliard ýuana çenli ösdi we çaklamalara görä, 2029-njy ýyla çenli 70 milliard ýuana ýeter.
