Ordosyň çägeli depejiklerinden Suýanyň köllerine çenli: Hytaýyň syýahatçylyk kartasyny üýtgeden bäş gün
Sähralykdaky ýaryşlary, suw welosipedleri, eko-turlar we bir etrapda 624 müň myhman — Hytaýyň sebitleri tebigaty nädip esasy baýramçylyk attraksionyna öwürdiler?
Hytaýyň köp sebitleri, sişenbe güni tamamlanýan bäş günlük maý baýramçylygy döwründe syýahatçylara dürli ugurlaryny hödürlemek üçin öz tebigy gözelliginden peýdalanýarlar. Bu barada CCTV+ habarynda aýdylýar.
Hytaýyň demirgazygyndaky Içki Mongoliýa awtonom sebitinde ýerleşýän Ordos şäheri özüniň sähralygyny syýahatçylyk merkezine öwürdi. Bu ýerde ýolsuz ýerde ýaryşlar, sähra medeniýeti bilen tanyşlyk we gyzykly güýmenjeler hödürlenilýär.
Şenbe gününden duşenbe gününe çenli ýurduň çar künjeginden gelen bäş ýüzden gowrak ýolsuz ýerden ýöreýän ulag we iki müňden gowrak sürüji Ordos şäheriniň Hanzsin etrabyndaky Kubusi çölüne ýygnandylar. Ol ýerde dartgynly çöl ýaryşlary geçirildi. Sürüjiler çylşyrymly tilsimleri: driftleri we böküşleri ýerine ýetirmek üçin çägeli depejikleriniň inersiýasyndan peýdalanýarlar.
Hytaýyň gündogar we merkezi şäherlerinde suw sportunyň görnüşleri, köl kenaryndaky kemping we eko-turlar barha meşhurlyga eýe bolýar. Olar syýahatçylyk dynç alşynyň täze akymyny emele getirýärler.
Hytaýyň gündogaryndaky Szýansu welaýatynyň Susýan şäherinde, baýramçylyk günlerinde syýahatçylar Çžuhaý sport-güýmenje şäherçesine köpçülikleýin geldiler. Suw sporty we dynç alyş zolagy ýaşlaryň iň gelim-gidimli ýerine öwrüldi. Syýahatçy Szou Ýutun “Bu ýerde kaýaking, karting we kemping ýaly örän köp güýmenje bar” diýip belledi. Ol bu ýerde suw welosipedini sürüp gördi. Bu hakykatdan-da täsirli we örän hezil boldy.
Hytaýyň merkezindäki Henan welaýatynda ýerleşýän Siçuan etrabynyň Danszýan ajaýyp ýerleri, suwy günortadan demirgazyga akdyrmak boýunça orta ugur taslamasynyň gözbaşy hökmünde tanalýar. Onuň özboluşly ekologiýa serişdeleri tutuş ýurtdan gelen myhmanlary özüne bendi etdi. Ýerli maglumatlara görä, maý baýramçylygynyň ilkinji üç gününde Siçuana 624 müň syýahatçy geldi. Bu bolsa syýahatçylykdan 300 million ýuandan gowrak girdeji getirdi.
