Elektromobiller maý aýyndaky syýahatlaryň görnüşini üýtgedýär
Hytaýyň awtoulag ýollarynda zarýad beriş mukdary geçen ýyl bilen deňeşdirilende 55,6% artdy
Bu ýyl Hytaýda maý baýramçylyk günleri bir zady anyk görkezdi: uzak aralyklara elektrik ulaglary bilen syýahat etmegiň döwri doly güýjüne girdi. Bäş günlük dynç alyşyň ilkinji gününde ýurduň awtoulag ýollarynda elektromobilleriň zarýad alyş mukdary geçen ýylyň degişli döwri bilen deňeşdirilende 55,6% artdy. Bu bolsa ulag hereketiniň gurluşynda düýpli üýtgeşmäniň bolup geçýändigini görkezýär, sebäbi elektromobiller uzak aralyklara syýahat etmek üçin giňden saýlanylýan ulag görnüşine öwrüldi. Bu baradaky maglumatlary CCTV+ habar berýär.
Milli energetika müdirligi tarapyndan çap edilen maglumatlara görä, anna güni awtoulag ýollarynda elektromobilleriň zarýad alyş mukdary 23 million kilowat-sagatdan geçip, degişli döwür üçin täze rekord goýdy. Bu maglumatlar milli gözegçilik platformasyna birikdirilen 57 müň 600 zarýad beriş stansiýasynyň seljermesine esaslanýar.
Ulag ministrliginiň çaklamalaryna görä, baýramçylyk döwründe her gün ortaça 15,4 million elektromobil awtoulag ýollarynda hereket eder. Bu ähli ulaglaryň 24%-ini emele getirýär we geçen ýyl bilen deňeşdirilende 33% köpdir.
Zarýad bermäge bolan islegiň çalt artmagy bilen baglylykda ýerli häkimiýet edaralary we elektrik torlarynyň operatorlary ýokary kuwwatly zarýad stansiýalarynyň gurulmagyny çaltlandyrdylar. Hytaýyň gündogaryndaky Szýansu welaýatynyň Nankin şäherinde awtoulag ýollarynda goşmaça 118 sany dürli kuwwatly zarýad enjamy oturdyldy, bu bolsa geçirijilik ukybyny geçen ýyl bilen deňeşdirilende takmynan 50% ýokarlandyrdy.
Günorta Hytaýdaky Guandun welaýatynda energiýa üpjünçilik edaralary öz işiniň çaltlygyny ýokarlandyrdylar: olar ulag akymyna görä esasy hyzmat nokatlarynda göçme zarýad enjamlarynyň paýlanyşyny hakyky wagt tertibinde sazlaýarlar, bu bolsa ýokary dyknyşykly sagatlarda has netijeli hyzmat etmäge mümkinçilik berýär.
Sürüjileriň biri öz täsirleri bilen paýlaşdy: onuň aýtmagyna görä, takmynan on minutda zarýad alyp, ýoluny dowam etdirmek bolýar — bu bolsa hakykatdan hem amatly.
Häzirki wagtda Hytaýda 21 milliondan gowrak zarýad beriş stansiýasy bar we olar 19 welaýatdaky ähli ilatly ýerleri gurşap alýar.
