Hytaýyň peýdaly iýmit önümleri Kanton ýarmarkasynda dünýäni haýran galdyrýar. Az şeker, tebigy düzümler — sagdyn iýmitlenmegiň täze standarty
Kanton ýarmarkasyna gelýän myhmanlar oýnawaçlar we dokma önümleri bilen tanyşýan mahaly, azyk pawilýonynda aýratyn bir özgerişlik bolup geçýär. Şekersiz süýjüler, tebigy guradylan miweler, konžakdan taýýarlanan pes kaloriýaly naharlar — hytaý öndürijileri saglyga üns berip, şol bir wagtyň özünde däp bolan tagamlary saklaýarlar. Bu barada CCTV+ şeýle habar berýär:
“Täze hytaý stilindäki” tagamly we peýdaly azyk önümleriniň giň görnüşi Hytaýyň günortasyndaky Guançžou şäherinde geçirilýän, 139-njy Hytaý import we eksport ýarmarkasynda (Kanton ýarmarkasy) dünýäniň dürli ýurtlaryndan gelen alyjylaryň ünsüni çekýär.
Bu ýyl ýarmarka Guandun welaýatynyň Guançžou şäherinde üç tapgyrda geçirilýär we 5-nji maýa çenli dowam edýär. 1–5-nji maý aralygyndaky üçünji tapgyr oýnawaçlara, göwreli we çaga emdirýän eneler üçin harytlara, öý dokma önümlerine, kanselýariýa önümlerine hem-de saglyk we dynç alyş üçin önümlere bagyşlanýar.
Aýratyn ünsi süýjüler bölümi çekdi, bu ýerde köp sanly daşary ýurtly alyjy ajaýyp süýjüleri synlap, köp wagt geçirdi. Görnüşleriniň we tagamlarynyň köpdügine garamazdan, ähli süýjüleriň umumy aýratynlygy bar: olaryň düzüminde şeker az we olar saglyk üçin has peýdaly.
Dünýäde sagdyn iýmitlenmäge geçişi güýçlenýän döwürde hytaý kompaniýalary innowasiýa işlerini has-da giňeldýärler. Olar däp bolan tagamlary saklap, önümlerini döwrebaplaşdyrýarlar we olaryň az şekerli hem-de az goşundyly bolmagyny täze standart hökmünde kabul edýärler.
Awstraliýaly alyjy Eşli Zileski şeýle diýdi:
“Men şekersiz, şeýle-de tebigy ys berijileri we reňk berijileri ulanylýan köp görnüşi gördüm, bu bolsa diýseň begendirýär”.
Peýdaly süýjülerden başga-da, hytaý stilindäki ýeňil naharlaryň giň görnüşi hem daşary ýurtly alyjylaryň arasynda meşhur bolýar.
Sergä gatnaşan Li Si şeýle belledi:
“Ýurduň içinde-de, daşary ýurtlarda-da adamlar barha pes kaloriýaly, pes ýagly we ýokary süýümli iýmitleri ýaly sagdyn iýmitleri saýlaýarlar”.
Ermenistandan gelen alyjy Mariýa Çekuçýan şeýle diýdi:
“Ata-eneler esasan çagalarynyň hem-de özleriniň saglygy barada alada edýärler, şonuň üçin esasy maksadymyz Hytaýdan Ermenistana takmynan 100 göterim tebigy bolan peýdaly süýjüleri, guradylan miweleri we guradylan naharlary eksport etmek”.
Konžak önümleri — kökünden pes kaloriýaly iýmit goşundylary öndürilýän ösümlikdir. Şeýle önümler nol kaloriýa eýe bolup, iýmit süýümlerine baýdyr we huruş yslaryny hem-de souslaryň tagamyny gowy siňdirýär. Ýarmarkada bu önümler ýokary belokly we organiki önümler bilen birlikde daşary ýurtly alyjylaryň ünsüni çekdi.
Nigeriýaly satyn alyjy Çinedu Piter Ananawa öz täsirlerini şeýle paýlaşdy:
“Tagamy ajaýypdy, huruşlar bolsa örän ýerlikli saýlanypdyr, şonuň üçin hemme zat diýseň tagamlydy. Meniň pikirimçe, men ilkinji gezek kalmar topjagazlaryny we sygyr etinden taýýarlanan frikadelkany dadyp gördüm”.
