Hytaý dünýäniň iň uly awtomobil gatnaýjy gämisini gurdy we bu dünýä gämi gurluşyk pudagy üçin nämäni aňladýar?
2020-nji ýyllaryň ikinji ýarymy dünýä gämi gurluşygynyň taryhyna Hytaýyň diňe bir öňdebaryjylaryň yzyndan ýetmän, eýsem täze standartlary kesgitläp başlan döwri hökmünde girer. Sişenbe güni Guançžouda dünýäde deňi-taýy bolmadyk gämi resmi taýdan ulanmaga berildi.
Ol “Glovis Leader” diýlip atlandyrylýar. Onuň sygymy — 10 800 awtomobil ekwiwalentine deňdir. Emma optimallaşdyrylan ýerleşişi saýasynda, hakykatda oňa 11 000-e çenli ulag ýerleşdirip bolýar. Uzynlygy — 230 metr, ini — 40 metr. On dört sany palubasy bar. Bu ägirt uly gämi diňe bir adaty maşynlary däl, eýsem elektromobilleri, wodorod bilen işleýän ýük ulaglaryny we agyr tehnikalary hem daşamaga ukyplydyr.
Emma iň esasy zat hatda onuň ululygy hem däl. Iň esasy zat — ony kimiň we nähili gurandygydyr.
«Guangzhou Shipyard International» (CSSC-niň golçur kärhanasy) gämi gurluşykçylary diňe bir ägirt uly gämi döretmek bilen çäklenmediler. Olar muny garaşylýan wagtda has çalt, has arzan we has ýokary hilli ýerine ýetirdiler. Gämi bellenen möhletinden öň tabşyryldy. Ol iki görnüşli ýangyç ulgamy (STG + adaty ýangyç) bilen enjamlaşdyrylan we iň berk ekologik standartlara (Tier III) laýyk gelýär. Onda energiýany tygşytlaýjy tehnologiýalar: optimallaşdyrylan gurluş, ýylylygy yzyna gaýtaryp ulanmak we kenardan elektrik iýmitlendiriş ulgamlary ulanyldy.
Şol bir wagtyň özünde, üpjünçilik zynjyryna doly gözegçilik edilmegi bilen gurluşygyň bahasy has pes derejede galdy.
«Häzirki wagtda gäminiň gurluşy 11 müňe çenli standart awtomobili ýerleşdirmäge mümkinçilik berýär» — diýip, taslamanyň tehniki menejeri Çžan Fuli buýsanç bilen belleýär.
Sanlar hemme zady aýdyň görkezýär. Kompaniýa awtomobil gatnatmak üçin niýetlenen gämiler boýunça 40-dan gowrak sargyt aldy. Olaryň 26-sy eýýäm tabşyryldy. Ählisi meýilnamadan öň ýerine ýetirildi. 2025-nji ýylda ýene-de 11 gämi tabşyrylar — olar meýilnamadakydan ortaça 151 gün öň taýýar bolar.
Kompaniýanyň umumy sargytlar portfeli 100 milliard ýuana (takmynan 14,6 milliard dollara) ýetýär. Olaryň 95%-inden gowragy bolsa daşary ýurt şertnamalarydyr. Önümçilik meýilnamasy 2030-njy ýyla çenli eýýäm dolupdyr.
Gäminiň kime tabşyrylandygy hem örän ähmiýetlidir. Sargyt ediji — Günorta Koreýanyň «HMM» kompaniýasy, ony ulanjak bolsa «Hyundai Glovis» kompaniýasydyr. Ýagny, öňdebaryjy deňiz döwletleri öz flotynyň iň esasy gämilerini gurmak üçin Hytaýyň gämi gurluşyk kärhanalaryny saýlaýarlar.
«Biz ýokary tehnologiýaly gämileriň önümçiligini we awtomobilleriň eksportyny goldamak üçin akylly deňiz platformalaryny, dronlary we gözegeçi gämilerini ulanýarys» — diýip, Nanşa deňiz gözegçilik gullugynyň işgäri Çen Liçžun belledi.
Hytaý diňe bir dünýäniň iň uly awtomobil gatnaýjy gämisini gurmak bilen çäklenmedi. Ol munuň ýaly işleri başgalardan has çalt, has arzan we tehnologik taýdan has kämil derejede ýerine ýetirip biljekdigini subut etdi. Dünýä bazary bolsa eýýäm muňa öz bahasyny berdi.
