Guançžouda 139-njy Kanton ýarmarkasynyň üçünji tapgyry açyldy
Anna güni Hytaýyň günortasyndaky Guandun welaýatynyň merkezi Guançžou şäherinde Kanton ýarmarkasy hökmünde tanalýan 139-njy Hytaý import we eksport ýarmarkasynyň üçünji tapgyry başlandy. Üns merkezinde — öý goşlary we durmuş harytlary bar.
Dünýäniň iň iri söwda sergisiniň bäş günlük tapgyry 1-5-nji maý aralygynda dowam eder. Onuň mowzuklaýyn bölümleri oýunjaklary, göwreli we çaga emdirýän eneler üçin harytlary, öý tekstilini, kanselýariýa önümlerini, şeýle hem saglyk we işjeň dynç alyş üçin önümleri öz içine alýar. Umumy sergi meýdany 515 müň inedördül metre deň bolup, onda 25 müň sany diwarlyk ýerleşdirildi.
Üçünji tapgyrda şeýle hem saglygy goraýyş üçin akylly harytlar, moda meýilleri we “kümüş ykdysadyýeti” üçin goşundylar hödürlenýär — bularyň hemmesi dünýä alyjylarynyň ýokary hilli sagaldyş önümlerine, şahsy isleglere laýyk harytlara we emosional goldawa bolan barha artýan isleglerini kanagatlandyrmaga gönükdirilendir. Ýarmarkanyň çäklerinde ilkinji gezek 150-den gowrak täze önüm tanyşdyrylar.
Kanton ýarmarkasy 15-nji aprelden 5-nji maýa çenli üç tapgyrda geçirilýär we olaryň her biri öňdebaryjy önümçilikden başlap, öý harytlaryna çenli dürli görnüşlere degişlidir. Serginiň umumy meýdany 1,55 million inedördül metre ýetýär, onda 75,7 müň diwarlyk ýerleşdirilip, oňa 32 müňden gowrak kärhana, şol sanda 3900-e golaý täze goşulan kompaniýa gatnaşýar.
1957-nji ýylda esaslandyrylan Kanton ýarmarkasy Guançžouda ýylda iki gezek geçirilýär. Bu Hytaýyň iň gadymy iri halkara söwda çäresi bolup, ol hakyky manysynda ýurduň daşary söwdasynyň “barometri” hasaplanýar.
