Dokuzynjy «Sanly Hytaý» sammiti: robotlar we emeli aň gündelik durmuşy özgerdýär
Fuszýan welaýatynyň Fuçžou şäherinde dokuzynjy «Sanly Hytaý» sammiti açyldy. Ol robototehnikanyň we beýleki täze tehnologiýalaryň gündelik durmuşy nähili özgerdip biljekdigini görkezdi. Esasy üns iň täze innowasion işläp düzmelere gönükdirildi.
Iki günlük çäre çarşenbe güni başlandy. Görkezilen tehnologiýalaryň we önümleriň 65 göteriminden gowragy ilkinji gezek köpçülige hödürlendi. Serginiň meýdany 56 müň inedördül metre deň bolup, bu ýyl onda emeli aňa esaslanýan innowasiýalara, şol sanda emeli aňyň robototehnikanyň ösüşine ýetirýän täsirine bagly täze bölüm döredildi.
Aşhanadaky kömekden başlap, stol üstündäki oýunlara çenli — sammitdäki robotlar çylşyrymly hojalyk işlerini ýerine ýetirmäge bolan ukyplaryny görkezdiler. “China Mobile" kompaniýasynyň wekili täze çykarylan dört aýakly robot-ýolbelet iti görkezdi. Ol robotyň goşmaça aýratynlyklaryna ünsi çekdi: göreji pes adamlar üçin niýetlenen gurnalan hasa, şeýle hem kiçiräk şahsy goşlary dakmak üçin ýörite berkidijiler bar.
«Onuň esasy funksiýalary — awtonom nawigasiýa we görkezme bermekdir. Biz robot-ite “akylly” penjek ýaly täze daşky aksesuarlary goşduk. Şol penjek geýdirilenden soň, robot-it bütin bedeni bilen duýuş ukybyna eýe bolýar» — diýip, “China Mobile” kompaniýasynyň Hançžou ylmy-barlag merkeziniň sergi dolandyryjysy Sin Siszýa düşündirdi.
Kiçi forumlaryň birinde "China Mobile" şeýle hem emeli aňa esaslanýan 40-dan gowrak hyzmaty — "akylly" töleglerden başlap, senagat goşundylaryna çenli tanyşdyrdy.
Bu innowasiýalaryň ählisi täze nesliň awtomatlaşdyrylyşynyň iki taraply ornuny görkezýär: amaly meseleleri çözmek we durmuş ýörelgesine hem-de dynç alşa täze öwüşginleri goşmak. Bu hatda Fuszýan welaýatynda çuňňur ornaşan çaý medeniýetine hem degişlidir. Görkezme diwarlygynda çaý taýýarlaýan robot çaý ýapraklaryny saýlap almakdan başlap, iň soňky guýulmagyna çenli ähli amaly doly özleşdirdi.
Şol bir wagtyň özünde, entellektual emeli aň kömekçileri awtomobilleri ýönekeý bir ulag serişdesinden mobil “akylly” giňişliklere öwürýärler.
«Bu ýerde biz teksti ssenariýä öwürmek funksiýasyny görkezýäris. Diňe bir sesli buýruk arkaly awtomobiliň içindäki köp sanly sazlamalary dolandyryp bilersiňiz. Emeli aň siziň maksadyňyza düşünýär we ýel berijiniň tizligi hem-de temperatura ýaly görkezijileri awtomatiki usulda sazlaýar» — diýip, intellektual awtomobil salonlary boýunça hünärmen Sýu Şiýu gürrüň berdi.
«Sanly Hytaý» sammiti «Innowasiýalary we sanly tehnologiýalaryň ösüşini çaltlandyrmak hem-de sanly Hytaýyň gurluşyny çuňlaşdyrmak» diýen şygar astynda geçdi.
