Hytaýdaky iň uly aşa çuň gaz-kondensat käninde guýularyň sany 12-ä ýetdi
Hytaýdaky iň uly aşa çuň gaz-kondensat käni — demirgazyk-günbatar Hytaýyň Sinszýan-Uýgur awtonom sebitinde ýerleşýän Boszy-Dabeý gaz zolagy möhüm önümçilik görkezijisine ýetdi: şenbe gününe çenli hersi 1 milliard kub metrden gowrak tebigy gazy öndürýän ýokary öndürijilikli guýularyň sany 12-ä ýetdi.
Bu üstünlik PetroChina Tarim Oilfield kompaniýasynyň yzygiderli tehnologik täzelikleri we kämilleşdirilen dolandyryşy netijesinde gazanyldy. Soňky ýyllarda kän üçin ýerasty gorlary, guýulary we ýerüsti desgalary öz içine alýan toplumlaýyn işläp taýýarlama modeli döredildi. Şeýle hem guýulary arassalamak we gazy suwdan arassalamak ýaly ýöriteleşdirilen tehnologiýalaryň toplumy işlenip düzüldi.
“Gaz çykaryşyna päsgel berýän suw ýygnanmagy meselesini çözmek üçin biz suwy aýyrmak we gaz çykaryşyny artdyrmak boýunça bäş bölekden ybarat innowasion gözegçilik ulgamyny döretdik. Bu ulgam gözegçilik, drenaž, sazlamak, nasoslap ýygnamak we petiklemek tehnologiýalaryny birleşdirýär hem-de gaz guýularynyň hyzmat möhletini uzaltmaga mümkinçilik berýär”, — diýip, PetroChina kompaniýasynyň Tarim nebit käniniň Boszy-Dabeý zolagyndaky önümçilik we ekspluatasiýa bölüminiň müdiri Tan Çženweý aýtdy.
Boszy-Dabeý gaz zolagy Týanşan daglarynyň günorta etegindäki Tarim çukurlugynda ýerleşip, gorlary bolsa adatça 6000 metrden hem gowrak çuňlukda ýerleşýär.
2019-njy ýylda uly möçberli gaz çykarylyşy başlany bäri Boszy-Dabeý zolagy Tarim nebit käniniň ösüşiniň esasy hereketlendirijisine öwrüldi. Häzirki wagtda bu ýerde 80-den gowrak guýy işleýär. Diňe 2026-njy ýylda bu zolaga bäş täze guýy ulanylmaga berildi we öň işlemeýän iki guýy gaýtadan işe girizildi.
