Sanýadaky 6-njy Aziýa kenarýaka oýunlarynyň guramaçylary ekologiýa arassalygyna aýratyn ähmiýet berýärler
6-njy Aziýa kenarýaka oýunlarynyň guramaçylary durnukly ösüşi çäräniň esasy maksady edip goýýarlar. Olar Hytaýyň günortasyndaky Haýnan welaýatynyň tropiki kurort şäheri bolan Sanýanyň tebigy gurşawyny gorap saklajak, hakyky ekologiýa taýdan arassa we «galyndysyz» sport festiwalyny geçirmegi maksat edinýärler.
Ýekşenbe güni geçirilen metbugat maslahatynda guramaçylyk komiteti ekologiýa taýdan jogapkärli Oýunlary geçirmek boýunça edilýän tagallalar barada jikme-jik maglumat berdi.
Kenarýaka futboly, tekbol we beýleki sport görnüşleri boýunça ýaryşlaryň geçiriljek Ýuhaý köçesindäki binalar toplumynyň çäginde gurlan wagtlaýyn sport meýdançalary esasy üns merkezinde durýar.
«Ähli gurluşlar, şol sanda münberler we sahna alýumin profillerinden, pol örtükleri bolsa gaýtadan işlenip bilinýän serişdeler bolan bambukdan we agaçdan ýasaldy. Ulanylýan serişdeleriň takmynan 95 göterimi gaýtadan işlemäge we gaýtadan ulanmaga degişlidir» diýip, infrastruktura hünärmeni U Çžipen belledi.
Oýunlar tamamlanandan soň, kenarýaka dolulygyyna öňki tebigy ýagdaýyna getiriler.
Ulag ulgamynda komitet pes uglerodly hereketliligi işjeň ilerledýär. Oýunlaryň ähli 1021 resmi ulagy diňe ekologiýa taýdan arassa elektrik energiýasy bilen işleýän täze energiýa çeşmeli ulaglardyr. Hatda ulaglarda goýulýan zibil haltalary we süpürgiçler ýaly ownuk zatlar hem ekologiýa taýdan arassadyr.
«Biz täze energiýa çeşmeli ulaglary ulandyk we diňe ekologiýa taýdan arassa elektrik energiýasy bilen işleýän zarýad beriş bekletlerini saýlap aldyk. Hatda awtomobilleriň içindäki zibil haltalary we süpürgiçler ýaly serişdeler hem ekologiýa taýdan arassa, biodegradirlenýän (tebigatda öz-özünden dargaýan) serişdelerden ýasaldy» diýip, Oýunlaryň ulag departamentiniň ulag dolandyryş müdiri Çžao Ýuhua aýtdy.
6-njy Aziýa kenarýaka oýunlary 22-30-njy aprel aralygynda Sanýada geçiriler. Oňa sportuň 14 görnüşi, 15 ugur we 62 ýaryş girizildi.
