Kanton sergisi dünýäniň dürli künjeginden gelen alyjylary döredijilikli tagamlar bilen haýran galdyrýar
Hytaýyň günortasyndaky Guançžou şäherinde geçirilýän we «Kanton sergisi» hökmünde hem tanalýan Hytaýyň import we eksport harytlarynyň 139-njy sergisinde bu çäräden ylham alnyp taýýarlanylan medeni-döredijilikli doňdurmalaryň, şokoladlaryň we kökeleriň çäklendirilen toplumy hödürlendi. Halkara söwda gatnaşyjylary üçin bu önümler diňe bir şertnama baglaşmak mümkinçiligi däl, eýsem, ýatdan çykmajak sowgatlyk bolar.
Doňdurma Kanton sergisiniň sergi zalynyň elementlerini öz içine alyp, onda serginiň özüne çekiji resmi tumarlary bolan Hao Bao (erkek ary) we Hao Ni (urgaçy ary) şekillendirilýär, şeýle hem ol şäheriň simwoly bolan kapok güli bilen bezelendir. Sergide geçirilen ýadowly günden soň, bu süýjülik hakyky güýç we lezzet bagyşlaýar.
Şokolad diňe bir tumarlaryň bezegini özünde jemlemän, eýsem Guandun welaýatynyň meşhur «oýanan arslanyň» şekiliniň elementlerini hem döredijilikli utgaşdyrýar. Ol örän näzik we ajaýyp tagama eýedir.
Özüniň täsirli daşky görnüşi we ajaýyp ysy bilen, ol köp sanly daşary ýurtly alyjylaryň göwnünden turmagy başardy.
«Men ony birinji gezek görenimde, örän ýakymly bolup göründi. Bu meniň ilkinji täsirimdi, emma hakykatda bolsa ol örän tagamly eken. Meniň pikirimçe, onuň düzüminde süýt bar we bu örän lezzetli» diýip, madagaskarly alyjy zenan aýtdy.
«Maňa onuň örän gaýmaklydygy, gaýmaga örän baýdygy diýseň ýaraýar. Şeýle-de, bezegi hem örän owadan. Ol hakykatdan hem örän ýakymly» diýip, zimbabweli alyjy zenan belledi.
«Daşky görnüşi örän ýakymly. Bu doňdurmada maňa aýratyn ýaraýan zady — onuň düzüminde şekeriň azlygydyr» diýip, nigeriýaly alyjy zenan aýtdy.
Şu ýylky Kanton sergisinde, şeýle hem, ählisinde serginiň nyşany bolan çörekler, kökeler we içi miweli tortlar hödürlendi. Bu döredijilikli azyk önümlerini sergi zalynyň ähli künjegindäki dürli dükanlardan we kafelerden satyn alyp bolýar.
15-nji aprel we 5-nji maý aralygynda geçirilýän, dünýäniň iň iri iki ýyllyk söwda sergisi üç aýratyn tapgyrdan ybarat bolup, olaryň her biri dürli haryt görnüşlerine degişlidir we «Öňdebaryjy önümçilik», «Ýokary hilli öý durmuşy» hem-de «Gowy durmuş» mowzuklary astynda geçirilýär.
Kanton sergisi Guançžouda ýylda iki gezek geçirilýär. 1957-nji ýylda esaslandyrylan bu sergi Hytaýdaky birnäçe iri halkara söwda çäreleriniň iň gadymysydyr we Hytaýyň daşary söwdasynyň “barometri” hasaplanýar.
