Hyzmatlar pudagy ýylyň birinji çärýeginde Hytaýyň ykdysady ösüşiniň 63,2%-ini üpjün etdi
Hytaýyň hyzmatlar pudagy ýurduň ykdysadyýetiniň esasy hereketlendirijisine öwrülip, ýylyň birinji çärýeginde umumy ykdysady ösüşiň 63,2%-ini üpjün etdi. Bu görkeziji geçen ýylyň degişli döwri bilen deňeşdirilende 4 göterim görkeziji ýokarydyr.
Maglumatlara görä, ýylyň ilkinji üç aýynda hyzmatlar pudagynyň goşulan gymmaty ýyllyk hasapda 5,2% ýokarlanyp, 20,61 trillion ýuana (takmynan 3,02 trillion ABŞ dollary) ýetdi.
Hususan-da, maglumat geçirişi, programma üpjünçiligi we maglumat tehnologiýalary, şeýle hem lizing we işewürlik hyzmatlary ugurlarynda goşulan gymmat degişlilikde 10,6% we 12,2% ýokarlandy.
Ýokary tehnologiýaly hyzmatlara goýlan maýa goýumlary hem tizleşdi: bu pudakda esasy serişdeler boýunça maýa goýumlar ýyllyk hasapda 12,3% artdy. Professional we tehniki hyzmatlara goýumlar 29,5%, maglumat hyzmatlaryna 20,9%, ylmy-barlag we taslama hyzmatlaryna bolsa 15,8% ýokarlandy.
“Hyzmatlar pudagynyň ösüşiniň hili kem-kemden adaty hyzmat görnüşlerinden täze modelleriň tarapyna üýtgeýär. Bu täze görnüşler gaýtadan işleýän senagat bilen çuňňur utgaşyp, bir tarapdan onuň özgermegine we döwrebaplaşmagyna işjeň goldaw berýär, beýleki tarapdan bolsa pudagyň umumy gurluşyny ep-esli gowulandyrýar,” - diýip, Hytaýyň ykdysady meýilleşdirişiniň esasy edarasy bolan Milli ösüş we özgertmeler komissiýasynyň Senagat ykdysadyýeti institutynyň Senagat barlagy müdirliginiň direktory Hun Sýunlýan aýtdy.
Ilkinji üç aýda hyzmatlar sarp edişinde hem işjeňlik ýokarlandy, täze işewürlik modelleri we hyzmat mümkinçilikleri peýda boldy.
Birinji çärýekde hyzmatlaryň bölek satuwy ýyllyk hasapda 5,5% ýokarlandy, bu bolsa harytlaryň bölek satuwynyň ösüşinden 3,3 göterim görkeziji ýokarydyr.
Syýahatçylyk, güýmenje we hyzmat platformalaryndaky amallaryň göwrümi 12,8%, medeni hyzmat platformalaryndaky amallar bolsa 8,2% artdy.
