Daşary ýurt diplomatlary Hytaýyň “geljegiň şäheriniň” çalt ösüşine şaýat bolmak üçin Sýunana baryp gördüler
Çarşenbe we penşenbe günleri daşary ýurt diplomatlarynyň wekiliýeti Hytaýyň demirgazygyndaky Hebeý welaýatynda ýerleşýän Sýunan täze etrabyna baryp, ýurduň “geljegiň şäheriniň” çalt ösüşini öz gözleri bilen gördüler.
Pekinden takmynan 100 kilometr günorta-günbatarda ýerleşýän Sýunan täze etraby 2017-nji ýylyň 1-nji aprelinde döredildi. Onuň maksady paýtagt hökmünde Pekiniň üstüne düşýän ikinji derejeli funksiýalary azaltmak, şeýle hem Pekin-Týanszin-Hebeý sebitiniň utgaşykly ösüşine ýardam bermekden ybaratdyr. Bu bolsa ilaty köp bolan sebitlerde ösüşiň täze modelini synagdan geçirmek bilen baglanyşyklydyr.
Iki gün dowam eden saparyň dowamynda Argentina, Pakistan, Iordaniýa we Latwiýa ýaly 18 ýurduň ilçilerinden we 60 diplomatdan ybarat wekiliýet Sýunan şäher hasaplaýyş merkezi, Sinochem Holdings Ltd. kompaniýasynyň täze baş edarasy, etrabyň startap zolagynyň toplumlaýyn hyzmat merkezi hem-de Baýýandýan kölüniň ýanyndaky Ýannan benti ýaly möhüm desgalara baryp gördüler. Bu sapar şäher meýilnamalaşdyrylyşy, gurluşyk we daşky gurşawy goramak ugurlarynda gazanylan üstünlikleri görkezdi.
Çalt ösýän etrapda ýerleşýän möhüm binagärlik desgalarynyň biri bolan täze Sinochem diňinde wekiller kompaniýanyň ýolbaşçylary bilen duşuşyp, döwlet eýeçiligindäki iri kompaniýanyň işi we onuň Sýunana göçmegi barada maglumat aldylar.
Sinochem Holdings kompaniýasy 2021-nji ýylda Sinochem bilen ChemChina kompaniýasynyň birleşmegi netijesinde döredildi. Kompaniýa 2025-nji ýylyň oktýabr aýynda baş edarasyny Sýunana göçürdi. Häzirki wagtda ol dünýäniň 150-den gowrak ýurdanda we sebitinde iş alyp barýar.
Slowakiýa Respublikasynyň Pekindäki ilçihanasynda ykdysady geňeşçi bolup işleýän Lýusiýa Skwareninowa Sýunanyň ösüş depginine haýran galandygyny belläp, onuň Hytaýyň geljekki ösüş konsepsiýalaryny şöhlelendirýändigini aýtdy.
“Esasan hem bu ýerde — täze gurlan binada bolanyňda ösüşiň nähili çalt gidýändigini görmek hakykatdanam täsin. Biz ony synlap, Sinochem ýolbaşçylary bilen hem gürrüňdeş bolup bilýäris”, — diýip, ol aýtdy.
Diplomatlar üçin Sinochem kompaniýasynyň göçmegi has giň gerimli synagyň, täze şäher senagat meýilnamalaşdyrylyşyny, akylly infrastruktura we halkara hyzmatdaşlygy üstünlikli utgaşdyryp bilermi diýen soraga jogap tapmak. mümkinçiligini açdy.
Iordaniýanyň Hytaýdaky ilçisi Hussam Al-Huseýni sanly we ekologiýa taýdan arassa tehnologiýalaryň utgaşdyrylmagyna ýokary baha berdi.
“Bu ýerde, Sýunanda ‘akylly şäher’ konsepsiýasynyň ösüşini we onuň täze, şol sanda ekologiýa taýdan arassa tehnologiýalary ornaşdyrmaga nähili goşant goşýandygyny synlamak örän möhümdir. Şonuň üçin men diplomatlar hökmünde biz bu ýere ýene-de birnäçe gezek geleris diýip ynanýaryn. Şeýle-de ýurdumyz Iordaniýadan myhmanlar gelen mahaly, olara şeýle üstünlikli ösüşi görkezmek üçin bu ýer ajaýyp mümkinçilik bolar”, — diýip, ol belledi.
Saparyň dowamynda diplomatlar şäher dolandyryşy, ekologiýa ösüşi we halkara hyzmatdaşlyk boýunça giňişleýin pikir alyşdylar. Köpüsi Sýunanda gazanylan ösüşlerden uly täsirlenendigini aýdyp, bu ýerde ulanylýan innowasion çemeleşmeleriň beýleki ýurtlaryň, aýratyn-da ösýän döwletleriň şäher ösüşi üçin gymmatly tejribe bolup biljekdigini bellediler.
“Bu şäherde hyzmatlar ulgamynda sanly we programma üpjünçilik tehnologiýalarynyň giňden ulanylýandygyny görmek örän gowy tejribe boldy. Biz geljegiň örän umyt berýändigini gördük”, — diýip, Huseýni aýtdy.
“Bu ýer men örän haladym, sebäbi bu ýerde köp täze binalary, owadan şaýollary, täze zawodlary we başga-da köp zatlary görýäris. [Sýunan] — bu geljegiň we parahatçylygyň şäheridir”, — diýip, Demirgazyk Makedoniýa Respublikasynyň Hytaýdaky ilçisi Saşko Nasew aýtdy.
