«Akylly» önümler 139-njy Kanton ýarmarkasynda uly gyzyklanma döretdi
Hytaýyň günortasyndaky Guandun welaýatynyň paýtagty Guançžou şäherinde häzirki wagtda geçirilýän 139-njy Hytaý import we eksport sergisinde (Kanton ýarmarkasy diýlip hem tanalýar) «akylly» önümler uly meşhurlyga eýe bolýar.
Anna güni sergidäki «akylly» tehnologiýalar zolagy has-da köp ünsi özüne çekdi.
Esasy aýratynlyklaryň arasynda hyzmat ediji robotlar bölümi aýratyn orun eýeledi. Bu ýerde 46 kompaniýa öz önümleriniň giň görnüşini hödürledi.
Soňky iki günüň dowamynda bu zolaga her gün ortaça 24 000-den gowrak adam baryp gördi.
Häzirki Kanton ýarmarkasy 15-nji aprelden 5-nji maýa çenli dowam edýär we üç aýratyn tapgyrdan ybarat bolup, olaryň her biri dürli önümler kategoriýalaryna bagyşlanandyr. Bu tapgyrlar «öňdebaryjy önümçilik», «hil taýdan ýokary öý durmuşy» we «has gowy ýaşaýyş» diýen mowzuklar bilen birleşdirilendir.
Birinji tapgyrda dört täze bölüm — sarp ediji dronlar, akylly geýilýän enjamlar, displeý tehnologiýalary we oba hojalyk dronlary — hödürlenip, olar bilelikde Hytaýyň «akylly» tehnologiýalar babatdaky innowasion üstünliklerini görkezýär.
«Men täze işläp taýýarlamalaryň köpüsini görýärin, aýratyn-da emeli aň bilen bagly önümlerde. Hytaý öndürijileri we zawodlary täze ösüşlere uly möçberde maýa goýýarlar. Bu ösüşleriň örän çalt gidýändigini görýärin. Şeýle hem bu emeli aň bilen bagly önümler sarp ediji elektronika bazaryny üýtgeder diýip pikir edýärin. Şonuň üçin hem muny uly artykmaçlyk hasaplaýaryn», — diýip, sergä gatnaşan gollandiýaly alyjy aýtdy.
Kanton ýarmarkasy 1957-nji ýylda döredilen gününden bäri her ýaz we güýz möwsüminde Guançžou şäherinde geçirilýär we Hytaýyň daşary söwdasynyň barometri hasaplanýar.
Hytaýyň iň gadymy söwda sergileriniň biri bolan bu ýarmarkada görkeziji taýdan rekord derejede gatnaşyjy hasaba alyndy — 32 000-den gowrak kompaniýa gatnaşýar, olaryň takmynan 3900-si ilkinji gezek çykyş edýär.
4,65 milliondan gowrak görkezilen önümleriň arasynda tehnologik innowasiýalar esasy orun eýeledi. Täze, ekologiýa taýdan arassa we özbaşdak işlenip taýýarlanan önümler degişli taýdan 23%, 22% we 25% paýy tutýar.
