Hytaýyň gämi gurluşygy depginini güýçlendirýär — tankerler we iň uly sütün kakma gämisi ulanyşa berildi
Hytaýyň gämi gurluşyk pudagy ep-esli ösüşi görkezýär: soňky günlerde birnäçe iri üstünlikler gazanyldy, bu bolsa dünýä derejesindäki senagat klasteriniň emele gelmegine ýardam edýär.
Belgiýaly gämi eýesine 319 müň tonna sygymly çig nebiti daşamak üçin niýetlenen ägirt uly tanker gowşuryldy. Gämi Hytaýyň döwlet gämi gurluşyk korporasiýasyna — CSSC degişli Qingdao Beihai Shipbuilding Heavy Industry Co., Ltd. (BSIC, ) kompaniýasy tarapyndan işlenip taýýarlandy we ammiak bilen işlemäge taýýar. Geljekde bu tehnologiýa gatnaw döwründe kömürturşy gazynyň zyňyndylaryny aradan aýyrmaga mümkinçilik berer.
Szýansu welaýatynyň Nantun şäherinde 180 müň kub metr sygymly suwuklandyrylan tebigy gaz (LNG) tankeriň gurluşygy tamamlandy. Gämi Hytaýda taslanyp, gurlup, üpjünçilik standartlaryna laýyk gelýär. Ony Haýmen bazasynda ýerleşýän Hytaýyň söwda-senagat kompaniýasy öndürdi. Tanker iki görnüşli ýangyç bilen işleýän pes tizlikli güýç enjamy bilen üpjün edilip, ýangyjyň bugarmasynyň pes derejesi we ýokary ekologiýa görkezijileri bilen tapawutlanýar. Bu bolsa arassa energiýaly uly tonnaly gämiler pudagynda hytaýly gämi gurluşykçylary üçin möhüm üstünlikdir.
Mundan başga-da, Nantunda dünýäde iň uly sütün kakma gämisi ulanyşa girizildi. Bu gämi deňiz köprüleriniň gurluşygy we deňiz inženerçilik taslamalary üçin zerur bolan enjamlary üpjün eder. Onuň tehniki aýratynlyklary täsir galdyrýar: uzynlygy — takmynan 130 metr, ini — 40 metr, diňiniň beýikligi — 156 metr, diametri 7 metre çenli we agramy 700 tonna çenli bolan sütünleri ýerleşdirmek mümkinçiligi, ýerleşiş takyklygy bolsa santimetr derejesine ýetýär.
Pudak bilermenleriň baha bermegine görä, Hytaýda ýokary tehnologiýaly enjamlaryň giňden ornaşdyrylmagy dünýä derejesindäki senagat klasteriniň emele gelmegini çaltlandyrar.
