Kunminde awtoulaglary synagdan geçirmek üçin ilkinji beýiklik merkezi açyldy
Hytaýyň günorta-günbataryndaky Ýunnan welaýatynyň paýtagty bolan Kunmin şäherinde ýurtda ilkinji awtoulag synag merkezi açyldy. Toplum deňiz derejesinden takmynan 2 müň metr beýiklikde ýerleşip, daşary ýurtlardaky beýiklikli ýol şertlerini emele getirmek üçin niýetlenendir. Indi ýerli öndürilen awtoulaglar ýurduň çäginden çykman, şuňa meňzeş şertlerde synagdan geçirilip bilner.
Poligonda birnäçe synag meýdançalary döredildi: uly beýiklikde dinamiki synaglar üçin zolak, göni hereket üçin niýetlenen ýol bölekleri, “Meksika ýoly” diýlip atlandyrylýan meýdança, tizlenme wagtynda ses derejesini ölçemek üçin trassalar, şeýle-de 40% çenli eňňitli ýol bölekleri.
Hytaýyň awtoulag tehnologiýalary we ylmy-barlag merkeziniň inženeri Szýan Bigan şeýle synaglaryň maksadyny düşündirdi. Uly beýiklikde hereketlendirijiniň kuwwaty peselýär, eňňitli ýollar bolsa köp daşary ýurt bazarlarynda giňden duş gelýär. Şeýle synaglar awtoulaglaryň geçijiligini bahalandyrmaga we olaryň pes kuwwatly şertlerde platolara çykmaga ukyplylygyny kesgitlemäge kömek edýär.
Inžener aýratynlykda “Meksika ýoly” meýdançasyna üns berdi. Bu ýer Meksikada duş gelýän çylşyrymly ýol şertlerini, şol sanda ýokarlanýan we çökýän “tizlik peseldijileri” ýatladýar.
Poligondaky iň kyn elementleriň biri ini 25 santimetr bolan, ýarym silindr görnüşindäki çykgytly “tizlik peseldijidir”. Meksikada şeýle gurluşlar ýokary tizlikli ýerlerde goýulýar we sürüjileri tizligi peseltmäge mejbur edýär. Bu ýerde geçirilýän synaglar awtoulagyň göwrüminiň berkligini we onuň çylşyrymly ýol şertlerine uýgunlaşmak derejesini barlaýar.
