55 ýyllyk «ping-pong diplomatiýasy»: Si Szinpin ýaşlary Hytaý bilen ABŞ-nyň arasyndaky gatnaşyklary berkitmäge çagyrdy
Anna güni Hytaý Halk Respublikasynyň Başlygy Si Szinpin hytaý-amerikan «ping-pong diplomatiýasynyň» 55 ýyllygy mynasybetli gutlag hatyny iberdi. Şol gün Pekinde bu senä bagyşlanan dabaralar geçirildi hem-de hytaýly we amerikan ýaş türgenleriniň arasynda sport alyş-çalyşlarynyň tapgyrynyň başlanmagyna badalga berildi.
Si Szinpin 55 ýyl mundan ozal Hytaý bilen ABŞ-nyň uly nesil ýolbaşçylarynyň ýokary syýasy paýhasy we strategik garaýşy netijesinde iki halkyň arasynda dostlukly alyş-çalyşlaryň täzeden dikeldilendigini ýatlatdy. Şeýlelikde, «kiçi top uly topy herekete getirip biler» diýen meşhur sözleriň taryhy ýüze çykdy.
Hytaýyň Başlygy hytaý-amerikan gatnaşyklarynyň binýadynyň halk tarapyndan goýulýandygyny, ikitaraplaýyn gatnaşyklaryň geljeginiň bolsa ýaş nesil tarapyndan kemala getiriljekdigini nygtady. Ol iki ýurduň ýaşlarynyň «ping-pong diplomatiýasy» bilen esas goýlan ýakyn gatnaşyklary täzeden janlandyrmagynyň we sport alyş-çalyşlaryna gatnaşmagynyň möhümdigini aýtdy.
Si Szinpin Hytaýda we ABŞ-da jemgyýetiň ähli gatlaklaryndan bolan adamlaryň, aýratyn-da ýaş nesliň, taryhdan paýhas we güýç almagyna umyt bildirdi. Ol iki ýurduň halklaryny alyş-çalyş we hyzmatdaşlyk arkaly birek-birege has gowy düşünmäge, özara öwrenmek arkaly öňe gitmäge, dostluk gatnaşyklaryny berkitmäge hem-de hytaý-amerikan gatnaşyklarynyň durnukly, sagdyn we dowamly ösüşine goşant goşmaga çagyrdy.
Hytaýyň wise-prezidenti Han Çžen dabarada Si Szinpiniň hatyny okady. Ol «ping-pong diplomatiýasynyň» ýurtlaryň arasyndaky gatnaşyklardaky ähmiýetini we onuň uzak möhletli global täsirini belläp, häzirki wagtda hytaý-amerikan gatnaşyklarynyň möhüm tapgyrda durandygyny aýtdy. Haniň aýtmagyna görä, Hytaý bilen ABŞ tarapyndan kabul edilýän strategik çözgütler dünýä ýagdaýynyň ösüşine täsir eder.
Han Çžen soňky 55 ýylda ýurtlaryň arasyndaky gatnaşyklaryň umumylykda üstünlikli ösdürilendigini nygtady. Tejribe durnukly we dowamly gatnaşyklaryň Hytaý we ABŞ halklarynyň umumy bähbitlerine hem-de halkara jemgyýetçiliginiň garaşmalaryna laýyk gelýändigini görkezdi.
Wise-prezident iki tarapy hem geçmiş tejribesine daýanmaga, döwlet baştutanlarynyň gazanan möhüm ylalaşyklaryna eýermäge, özara hormat goýmak ýörelgesini goramaga, parahatçylykly bile ýaşaýyş ýörelgelerini berjaý etmäge hem-de özara bähbitli hyzmatdaşlyga ymtylmaga çagyrdy.
Şeýle hem Han Çžen Hytaýa gelen amerikan ýaşlaryna ýüzlenip, ýurda gyzyklanma bildirmegi maslahat berdi. Ol ýaşlaryň Watanyna Hytaý barada obýektiw düşünje we hytaýly deň-duşlary bilen gymmatly dostluk gatnaşyklary bilen dolanyp gitmegini arzuw etdi.
Dabara takmynan 500 adam gatnaşdy. Myhmanlaryň arasynda «ping-pong diplomatiýasynyň» wakalaryna gatnaşyjylar, ýaş stol tennisçileri, türgenler we ABŞ-dan gelen amerikan futbolynyň ýaş oýunçylary bardy.
Taryhy maglumat: 1971-nji ýylyň aprelinde ABŞ-nyň stol tennisi boýunça ýygyndy toparynyň wekiliýeti Hytaýa sapary amala aşyrdy — bu birnäçe onýyllyklardan soň ýurda gelen ilkinji amerikan wekiliýeti boldy. Bu sapar «ping-pong diplomatiýasynyň» başlangyjyny goýup, Hytaý bilen Amerikanyň Birleşen Ştatlarynyň arasynda resmi diplomatik gatnaşyklaryň ýola goýulmagyna esas döretdi.
