ZGC forumynda FlagOS 2.0 atly açyk emeli aň ulgamy tanyşdyryldy
Anna güni Pekinde geçirilýän Çžunguznsun Forumy 2026 (ZGC Forum) atly ýyllyk maslahatda FlagOS 2.0 diýlip atlandyrylýan açyk emeli aň ulgamy tanyşdyryldy.
Hytaýyň öňdebaryjy ylmy-barlag guramalaryny we uniwersitetlerini öz içine alýan 23 edara tarapyndan bilelikde işlenip taýýarlanan bu açyk programma platformasy, dürli emeli aň çiplerini goldap bilýän bitewi hasaplaýyş infrastrukturasyny döretmegi maksat edinýär.
“Şu günler emeli aň üçin köp dürli çipler bar, ýöne esasy mesele olaryň dürli arhitekturasy we bölünen tehnologik gurluşlarydyr. Netijede, emeli aň modelleri we algoritmleri dürli çiplerde aňsat işläp bilmeýär. Bize bitewi, açyk aralyk gatlak — umumy tehnologik platforma gerek, şeýlelik bilen uly modeller döredilenden soň, olary dürli enjamlaýyn emeli aň platformalarynda aňsat ulanmak mümkin bolar,” - diýip, FlagOS 2.0-nyň döredijileriniň biri bolan Pekin Emeli Aň Akademiýasynyň (BAAI) wise-prezidenti we baş inženeri Lin Ýunhua aýtdy.
Hytaýyň açyk programma üpjünçiligi boýunça edýän tagallalary halkara derejesinde hem ykrar edilýär. Forumyň dowamynda BAAI açyk çeşmeli programma üpjünçiligi babatda hyzmatdaşlyk we innowasiýalar bilen meşgullanýan Eclipse Foundation bilen şertnama baglaşdy. Bu hyzmatdaşlyk bilelikdäki innowasiýalary ösdürmäge we global hasaplaýyş serişdeleriniň has çuň integrasiýasyna ýardam bermegi maksat edinýär.
Eclipse Foundation — Ýewropa Bileleşiginde hasaba alnan garaşsyz, täjirçilik däl gurama bolup, Eclipse açyk çeşmeli programma üpjünçiligi jemgyýetiniň dolandyryjysy hökmünde çykyş edýär.
“Açyk çeşme deň şertlerde hyzmatdaşlygyň ýoludyr. Şonuň üçin hem şu gün dürli çykyşlarda köp eşiden hyzmatdaşlygymyz global emeli aň ulgamyny gurmagyň açarydyr diýip pikir edýärin,” - diýip, Eclipse Foundation guramasynyň wise-prezidenti Maýkl Plagge aýtdy.
Bu ýylky ZGC Forumynyň ýyllyk maslahaty çarşenbe güni Pekinde açyldy we ýekşenbe gününe çenli dowam eder.
