Haýnan Hytaýyň açyklyk syýasatyndaky esasy merkezleriň birine öwrülýär: halkara maglumatlar
Halkara syýasatçylar we analitikler Hytaýyň günortasyndaky Haýnan ada welaýatynyň ýurduň açyklyk syýasatynyň öň hatarynda duran esasy merkeze öwrülendigini belleýärler. Haýnan erkin söwda portunyň golaýda giňeldilmegi hem-de Aziýa üçin Boaо forumynyň dowam etmegi ählumumy hyzmatdaşlygy çuňlaşdyrmak üçin täze mümkinçilikleri açýar.
Tropiki Haýnan adasy şu hepde üns merkezinde, sebäbi kenarýaka Boaо şäherinde 2026-njy ýylyň Aziýa üçin Boaо forumynyň ýyllyk konferensiýasy geçirilýär. Bu ýokary derejeli dialog üçin meýdança bolup, şu ýyl 25 ýyllygyny belleýär we dünýäniň 60 ýurdundan we sebitinden 2000-den gowrak gatnaşyjyny bir ýere jemledi.
Sişenbe güni başlan dört günlük forum geçen ýylyň dekabrynda Hytaýyň Haýnanda umumy ada boýunça ýörite gümrük düzgünini işe girizmeginden soň geçirilýär. Bu daşary ýurtlardan harytlaryň has erkin getirilmegine, paçsyz söwda zolagynyň giňeldilmegine we Haýnan erkin söwda portunyň işewürlik üçin has amatly şertleriň döredilmegine mümkinçilik berdi. Häzirki wagtda bu port meýdany boýunça dünýäde iň uly erkin söwda portuna öwrüldi.
Hytaýyň ýokary derejeli açyklyk syýasatynyň möhüm başlangyçlarynyň biri hökmünde garalýan Haýnan erkin söwda porty täze çäreleriň güýje gireninden bäri durnukly ösüş görkezýär we giñ halkara jemgyýetçiliginiň ünsüni çekýär.
Boaо forumynyň sebit ösüşiniň hereketlendirijisi hökmünde çykyş edýändigini belläp, öňki syýasatçylar onuň we Haýnan erkin söwda portunyň ählumumy ähmiýetini hem nygtadylar. Olar muny Hytaýyň açyklyk syýasatyna berk ygrarlylygynyň mysaly hökmünde görkezýärler.
“Boaо forumy Aziýada hyzmatdaşlygyň we sebit integrasiýasynyň ösmegine uly goşant goşdy. Ýörite gümrük çäreleri işe girizilenden soň, Haýnan erkin söwda porty çalt depginde ösüş gazandy. Aziýa üçin Boaо forumy Haýnan welaýatynyň sebitara arabaglanyşykdaky ornuny has-da güýçlendirer”, — diýip Taýlandyň ozalky wise-premýeri Finij Jarusombat aýtdy.
“Boaо forumynyň möhüm simwoliki ähmiýeti bar. Haýnan erkin söwda zolagynyň ösüşi we ýokary derejeli açyklyk arkaly Hytaýyň ykdysadyýeti has-da bäsdeşlige ukyply boldy. Has açyk we dostlukly syýasat alyp barýan Hytaý halkara hyzmatdaşlygyň täze görnüşlerini işjeň öwrenýär”, — diýip Polşanyň ozalky wise-premýeri Ýanuş Pehoçinskiý aýtdy.
Häzirki ykdysady näbellilik şertlerinde Haýnan erkin söwda zolagynyň çalt ösüşi daşary ýurt maýa goýumlary üçin hem möhüm mümkinçilikleri açýar. Adada ýerleşýän kompaniýalaryň arasynda “Siemens Energy” nemes turbina öndürijisi we “Mayoly” fransuz derman kärhanasy bar.
“Haýnan güýçli ösüş depginini saklaýar, ol ýerde amala aşyrylýan köp sanly maýa goýum taslamalary barada ýygy-ýygydan eşidýäris. Geografik taýdan amatly ýerleşişi sebäpli Haýnan dünýäniň öňdebaryjy işewürleri üçin örän özüne çekiji”, — diýip nemes “Berliner Zeitung” gazetiniň redaktory Aleksandr Dergai aýtdy.
Ösüp barýan ykdysadyýetli ýurtlar üçin hem Boaо forumy işewür gatnaşyklaryň ösmegine, maýa goýum mümkinçilikleriniň açylmagyna we Hytaý bilen söwda baglanyşyklarynyň çuňlaşmagyna ýardam berýän möhüm köpri boldy.
“Boaо forumy we beýleki forumlar kärhanalaryň duşuşmagy we hyzmatdaşlygy üçin ajaýyp mümkinçilikleri döredýär. Şeýle forumlaryň netijesinde has köp iş mümkinçilikleriniň dörejekdigine umyt edýäris. Şonuň üçin biz Boaо forumyna ýokary baha berýäris, sebäbi ol bize gönüden-göni aragatnaşyk gurmaga mümkinçilik berýär. Bizde serişdeler bar, ýaş ilatymyz bar, ýaşlar öwrenmäge taýýar. Şeýle-de bizde işewürler bar we olaryň käbiriniň Hytaýa gelip, hytaýly hyzmatdaşlar bilen söwda etmegine umyt edýäris”, — diýip Günorta Afrikanyň Gauteng welaýatynyň Kanun çykaryjy geňeşiniň başlygynyň orunbasary Tulani Kunene aýtdy.
Şu ýyl “Umumy geljegi döretmek: täze depgin, täze mümkinçilikler, täze hyzmatdaşlyk” diýen tema bilen geçirilýän Boaо forumy dört esasy ugurdan we 50-den gowrak kiçi forumdan, tegelek stol duşuşyklaryndan hem-de dialog sessiýalaryndan ybaratdyr.
2001-nji ýylda döredilen Aziýa üçin Boaо forumy häzirki wagtda Aziýa meselelerini çözmek we sebitde hem-de dünýä derejesinde hyzmatdaşlygy berkitmek üçin möhüm meýdança öwrüldi.
