Hytaýyň täjirçilik hemralary gündelik durmuşa düýpli üýtgeşmeler girizýär
Hytaýyň täjirçilik hemralary düzümiň gündelik durmuşynyň görünmeýän, ýöne iň möhüm bölegine öwrüldi. Olar oba hojalyk ýerlerinde hasyla gözegçilik etmek, infrastruktura desgalary gözden geçirmek we barha artýan ýerüsti hyzmatlary goldamak ýaly ugurlarda düýpli üýtgeşmelere ýardam edýär.
Penşenbe güni kabul edilen 15-nji bäşýyllyk meýilnamada (2026–2030-njy ýyllar) aerokosmos pudagy önümçiligiň ileri tutulýan we strategiki taýdan ösýän ugurlarynyň biri hökmünde kesgitlenildi.
Hytaýyň kosmos pudagynyň ösmegine itergi berýän kompaniýalaryň arasynda Hytaýyň demirgazyk-gündogaryndaky Szilin welaýatyndan «Changguang Satellite Technology Co., Ltd.» kompaniýasy hem bar. Ol ylmy-barlag institutyndan bazara gönükdirilen täjirçilik kosmos pudagynyň öňdebaryjysyna öwrüldi.
Ilkinji topary 2015-nji ýylyň oktýabr aýynda älem giňişligine uçurylan «Jilin-1» hemralar ulgamy häzirki wagtda 144 sany hemradan ybarat bolup, olar ýer şarynyň islendik nokadyny günde takmynan 40 gezek synlamaga ukyplydyr.
Bu üstünliklere garamazdan, kompaniýa şekiliň hilini saklap, hemralaryň agramyny azaltmak arkaly tehnologiki innowasiýalara bolan maksatlaryny dowam etdirýär.
«Biziň Gaofen-06 hemralarymyz, şeýle hem Magic Cube we Platform seriýalarymyz iň gowy ýagdaýda takmynan 20 kilogram agramy saklaýarlar. Şol bir wagtda olaryň surata düşüriş aýratynlyklary ozalky 400 kilogramdan gowrak bolan hemralar bilen doly deňleşip bilýär» — diýip, kompaniýanyň Mikrotolkunly hemra barlaglary boýunça barlaghanasynyň direktorynyň orunbasary Çžao Sýanýuý aýtdy.
«Jilin-1» hemralar ulgamy gündelik durmuşa we senagat ösüşine barha köp ornaşýar. Onuň ýokary durulykdaky maglumatlary oba hojalyk ýerlerini goramakdan başlap, şäherleriň giňelmegini gözegçilikde saklamaga çenli köp sanly pudaklary goldaýar we adamlaryň durmuşyna düýpli üýtgeşmeler getirýär.
«Ýel turbinalary we fotoelektrik desgalary ýaly käbir taslamalar uzakdaky daglyk ýerlerde gurlan. Olara elde gözegçilik etmek uly iş güýjüni we tagallany talap ederdi. Şu günki günde bolsa «Jilin-1» hemrasynyň giň meýdanlarda ýygy-ýygydan uly göwrümli maglumatlary alyp bilmegi netijesinde gözegçilik etmek mümkin boldy» — diýip, Szilin welaýatynyň Tebigy serişdeler departamentiniň kartografiýa we surata düşüriş bölüminiň direktory Ýan Hunweý aýtdy.
Kosmos pudagyny ösdürmäge gönükdirilen 15-nji bäşýyllyk meýilnamanyň çäklerinde «Changguang» kompaniýasy öz gerimini çalt depginde giňeldýär. Ýokary tehnologiýaly sehde hemralaryň köpçülikleýin önümçiligi alnyp barylýar. Kompaniýa diňe bir aralykdan zondirlemek däl, eýsem hemra aragatnaşygy ugrunda hem öz işini ýaýbaňlandyryp, pes ýerüsti orbitalarda hemra interneti pudagynda tehnologiki öňegidişliklere ýetdi.
«Geljekki barlaglarymyzda we taslamalarymyzda biz adaty aralykdan zondirleýji hemralaryň tehniki meselelerini ýokary orbitaly aragatnaşyk hemralarynyň meseleleri bilen birleşdirip, häzirki zaman aragatnaşyk hyzmatlarynyň talaplaryny ödemegi maksat edinýäris. Bular biziň çözmek üçin üstünde işleýän esasy wezipelerimizdir» — diýip, kompaniýanyň baş inženeriniň orunbasary Çžu Žuýfeý aýtdy.
