Pekiniň dermanhanalarynda ilkinji adamşekilli robot-satyjylar işläp başlady
Pekiniň ýaşaýjylary gündelik durmuşda geljegiň tehnologiýalary bilen işjeň tanyşyp başlaýarlar. Paýtagtyň Haýdýan etrabynda adamşekilli robotlar derman serişdeleriniň onlaýn sargytlaryny gaýtadan işlemek üçin resmi sertifikatlary aldylar.
Bu waka Hytaýyň milli saglygy goraýyş ulgamynda emeli aňyň ornuny giňeltmek ugrundaky işlerde nobatdaky möhüm ädim boldy. Ýurtda ilkinji gezek döredilen synag zolagynyň çäklerinde, bölek satuw dermanhanasy intellektual ulgamlaryň kömegi bilen dermanlary paýlamaga rugsat aldy.
Bu edarada “Galbot” atly adamşekilli robot işe girişdi. Ol mundan ozal dünýäniň iň meşhur telewizion wakasy bolan Bahar baýramy mynasybetli geçirilen dabaraly konsertde öz ukyplary bilen tomaşaçylary haýran galdyrypdy. Indi bolsa bu ýokary tehnologiýaly enjam ýurtda farmasewtika bölek satuwy üçin resmi taýdan sertifikatlaşdyrylan ilkinji robot hökmünde ykrar edildi.
Sargyt resmileşdirilenden soň, robot dermanlary adam gatnaşmazdan, doly awtonom usulda tapyp, barlap we berip bilýär. Alyja bolsa satyn alan zadyny almak üçin diňe telefon belgisiniň soňky dört sanyny tassyklamak ýeterlikdir.
Işläp düzüjiler hakyky söwda şertlerinde işlemegiň robotdan aýratyn ukyplary talap edýändigini nygtaýarlar. Esasy kynçylyk gaplamalaryň görnüşleriniň örän köpdürlüligindedir: adaty gutulardan başlap, dury çüýşejiklere we ýumşak paketlere çenli.
Kompaniýanyň strategiýa boýunça direktory Çžao Ýuliniň aýtmagyna görä, robotyň dürli zatlary ýalňyşsyz tutmak ukyby eýýäm 99,9 göterimden geçýär. Şol bir wagtyň özünde, häzirki wagtda enjamyň diňe görkezmesiz berilýän dermanlaryň satuwy bilen meşgullanýandygyny bellemek gerek.
Ygtyýarnamaly farmasewtler bolsa görkezme boýunça dermanlaryň berlişine gözegçilik etmek we bilermenlik maslahatlaryny bermek üçin öňküsi ýaly öz iş ýerlerinde galýarlar.
Lukmançylyk önümleriniň ýaýradylyşyna gözegçilik bölüminiň ýolbaşçysy Ma Sin häkimiýetleriň şeýle ulgamlaryň işiniň hiline ünsli gözegçilik edýändigini nygtady. Hünärmenler robotyň gaplamalara zeper ýetirýän-ýetirmeýändigini we maglumatlaryň dermanhananyň umumy dolandyryş ulgamyna näderejede dogry geçirilýändigini barlaýarlar. Şeýlelikde, ilata hyzmat etmekde robotlaryň gatnaşmagy ökde hünärmenleriň berk gözegçiligi astynda amala aşyrylýar.
