Hytaýda Bahar baýramy döwründe syýahatlaryň rekord derejesi hasaba alyndy
Şenbe güni çap edilen resmi maglumatlara görä 40 günlük ýazky syýahatlaryň iň gyzgalaňly möwsüminde Hytaý boýunça şäherara syýahatlaryň umumy sany rekord derejä ýetdi. Bu görkeziji 9,41 milliard adama deň bolup, 2025-nji ýylyň degişli döwri bilen deňeşdirilende 4,3 göterim köpdür.
Esasy agram awtomobil ulaglaryna düşdi. Agzalan döwürde ýurduň ýollarynda 8,74 milliard töweregi syýahat amala aşyryldy, bu bolsa geçen ýylkydan 4,2 göterim köpdür.
Şol bir wagtyň özünde, demir ýollaryndaky ýolagçy akymy geçen ýyl bilen deňeşdirilende 4,8 göterim artyp, 540 million adama ýetdi.
Raýat awiasiýasy pudagynda 94,39 million ýolagçy syýahaty hasaba alyndy, bu bolsa geçen ýylky görkezijiden 4,6 göterim köpdür.
Şeýle hem, deňiz we derýa ýollary arkaly daşalýan ýolagçylaryň sanynyň ep-esli artandygyny bellemek gerek, olar tas 36 milliona ýetip, geçen ýylky görkezijilerden 15,3 göterim ýokary boldy.
Bu döwürde Hytaýyň ulag edaralary agramy azaltmak we hyzmatyň hilini ýokarlandyrmak üçin dürli çäreleri gördüler.
Diňe goşmaça otly gatnawlaryny goşmagyň deregine, köp sanly menziller meşhur ugurlarda ýerleri paýlamak üçin uly maglumatlar ulgamlaryny ulandylar. Mundan başga-da, howa we demirýol menzillerinde ýolagçylara kömek etmek üçin robotlar işjeň peýdalanyldy, ýokary tizlikli ýollarda bolsa emeli aňa esaslanýan gözegçilik ulgamlary işledi.
Şu ýyl ilkinji gezek köp sanly demir ýol menzillerinde goşlary eltip bermek hyzmaty giň gerimde ýola goýuldy. Indi ýolagçylar onlaýn sargyt arkaly goşlaryny göni öýünden ugraýan menziline ýa-da barjak ýerine çenli ugradyp bilýärler.
Ýolagçylaryň bu köpçülikleýin akymy köplenç dünýädäki iň uly ýyllyk ilat migrasiýasy diýlip atlandyrylýar. Şeýle görkezijiler Hytaýyň ýaşaýjylarynyň ýokary ykjamlygyny we ýurtdaky depginli ykdysady işjeňligi görkezýär. Belläp geçsek, şu ýyl syýahatçylyk möwsüminiň iň gyzgalaňly döwri 2-nji fewralda başlap, 13-nji martda tamamlandy.
