Hytaýyň paýnamalary ösüş görkezdi
Bilermenleriň bellemegine görä, Ýakyn Gündogardaky galagoply ýagdaýlar sebäpli dünýäniň maliýe bazarlarynda durnuksyzlyk dowam edýän hem bolsa, Hytaýyň iri kompaniýalarynyň paýnamalaryny öz içine alýan CSI 300 indeksi geçen hepde sähelçe ösüş görkezdi.
Hepdäniň anna güni Hytaý biržalary pes görkezijiler bilen ýapyldy. Shanghai Composite Index 0.81 göterim peselip, 4 095.45 dereje görkezdi. Şeýle-de bolsa, CSI 300 indeksi hepdelik görkezijiler boýunça sähelçe ösüş gazandy.
“China Global Television Network” edarasynyň bazar seljerijisi Timoti Popyň aýtmagyna görä, nebitiň bahalarynyň üýtgäp durmagyna Hytaýyň az bagly bolmagy, bazaryň durnukly saklanmagyny goldady. Bu ýagdaý ýurduň giň gerimli elektrifikasiýalaşdyryş syýasaty we energiýa çeşmeleriniň dürli bolmagy bilen baglanyşyklydyr. Şeýle hem Ýakyn Gündogardan dökün üpjünçiligindäki bökdençlikler sebäpli, Hytaý ýazky ekiş möwsüminiň öňüsyrasy döwlet ätiýaçlyklaryndan dökün goýberip başlady.
Morgan Stanley we UBS ýaly maliýe edaralary, Hytaýyň A-paýnamalaryny häzirki töwekgelçilikli maýa goýum ýagdaýynda bazary diwersifikasiýalaşdyrmak üçin durnukly mümkinçilik hökmünde görkezýärler.
Pudaklar boýunça sarp ediş harytlarynyň paýnamalary, aýratyn-da Kweichow Moutai kompaniýasynyň paýnamalary ösüş görkezdi. Şeýle-de bolsa, nebit bahalarynyň üýtgäp durmagy sebäpli energetika we tebigy serişdeler pudagynyň paýnamalary peseldi.
