Hytaý Halk Respublikasynda ýokary bilim bilen gurşap almak 60%-den geçdi — bäş ýyllykda 55 million hünärmen
Hytaýda ýokary bilim bilen gurşap almagyň derejesi 60 göterimden geçdi diýip, Bilim ministri Huaý Szinpen şenbe güni geçiren metbugat maslahatynda mälim etdi. Ol Halk wekilleriniň Ählihytaý ýygnagynyň 14-nji çagyrylyşynyň 4-nji sessiýasynyň çäklerinde çykyş edip, ýurduň dünýäde iň uly we ýokary hilli bilim ulgamyna eýedigini nygtady.
Huaý Szinpen 14-nji bäş ýyllyk döwründe (2021–2025-nji ýyllar) Hytaýyň ýokary bilim ulgamynyň jemi 55 million ökde hünärmenleriň taýýarlandygyny belledi. Şunda gurşap almagyň derejesi iki esse artdy — 2012-nji ýylda Hytaýyň Kommunistik partiýasynyň 18-nji gurultaýynyň öňisyrasyndaky 30 göterimden hem az görkezijiden, şu günki 60 göterimden hem ýokary görkezijä çenli ýokarlandy.
Soňky iki ýylda Hytaýyň öňdebaryjy uniwersitetleri we beýleki ýokary okuw mekdepleri ýokary hilli bakalawr maksatnamalarynyň giňeldilmegi netijesinde, talyplaryň sanyny 38 müň adam artdyrdylar. Mundan başga-da, soňky bäş ýylda ýurtda bakalawr maksatnamaly 18 sany täze uniwersitet we 70 sany täze hünär kolleji döredildi. Bu bolsa talyplaryň sanyny 700 müňe çenli köpeltmäge mümkinçilik berdi.
Ministr bilim ulgamyndaky halkara hyzmatdaşlygyň ösüşi barada hem durup geçdi. Onuň aýtmagyna görä, bakalawr we ondan ýokary derejeler boýunça 540-dan gowrak täze hytaý-daşary ýurt bilelikdäki okuw mekdepleri we maksatnamalary açyldy. Munuň netijesinde talyplar üçin goşmaça 350 müň sany bilim mümkinçiligi döredi.
