Hytaýda täze oýunçylaryň peýda bolmagy bilen, täjirçilik maksatly adamşekilli robotlaryň durmuşa ornaşdyrylmagy çalt depginler bilen artdy
Hünärmenleriň berýän maglumatlara görä, Hytaýda adamşekilli robotlaryň ornaşdyrylmagy çaltlanýar, täze oýunçylar bolsa pudagyň ylmy-barlag barlaghanalaryndan hakyky durmuşda ulanylmaga geçmegi bilen bäsdeşligi we innowasiýalary goldaýarlar.
Şanhaýda ýerleşýän “AgiBot” şeýle hem “Zhiyuan Robotics” ady bilen tanalýan kompaniýasy 2025-nji ýylda dünýäniň iň uly adamşekilli robot bilen üpjin edijisine öwrüldi we onuň robotlary eýýäm güýmenje merkezlerinde, ylmy-barlag barlaghanalarynda, okuw otaglarynda we senagat önümçiliginiň başlangyç tapgyrlarynda işläp başladylar.
«Häzirki wagtda biz Hytaýyň senagatynyň we ýokary tehnologiýaly pudaklarynyň çalt ösýän tapgyrynda barýarys. Dünýäniň bu ýurduň diňe bir innowasion däl, eýsem bahasy boýunça elýeterli, ygtybarly we howpsuz bolan ýokary gymmatlykly ýokary tehnologiýaly önümleri öndürmäge ukyplydygyny ykrar etmegi örän möhümdir. Siz “AgiBot” robotlarynyň birini göni önümçilik ugrundan alyp, ony Suçžoudaky Szinszi kölüniň ýakasyndan Şanhaýdaky Bund şäheriniň kenar ýakasyna çenli (106 kilometr) bir gezek hem büdretmän ýöredip bilersiňiz. Häzirki wagtda esasy ulanylyşyň ssenariýalaryna şular girýär: birinjiden, maglumat ýygnamak we robotlary taýýarlamak; ikinjiden, sergi zallaryna gezelençler we müşderi hyzmaty; üçünjiden, kärende we çykyşlar, şeýle hem ylmy barlaglar we bilim. Senagat gurşawynda bu depgin deňeşdirme boýunça haýal, ýöne robotlar eýýäm ornaşdyrylýar. Mysal üçin, robot her gezek konteýneri galdyryp, ony gurnama ýerine ýerleşdirende, ol konteýneriň şekili seljermeli we indiki gezek haýsyny süýşürmelidigini özbaşdak karar bermeli — edil ynsan ýaly» — diýip, “AgiBot” kompaniýasynyň esasy önümçilik ugurlary boýunça prezidenti Wan Çuan belledi.
Halkara maglumatlar korporasiýasynyň (IDC) ýaňy-ýakynda çap eden hasabatyna görä, 2025-nji ýylda dünýäde adamşekilli robotlaryň iberilişi takmynan 18 000 birlige ýetip, öňki ýyl bilen deňeşdirilende 508 göterim artdy. Bu bazarda Hytaýyň kompaniýalary agdyklyk edýärler.
Geçen ýyl dünýäde adamşekilli robotlaryň satuwyndan gelip gowşan girdeji takmynan 440 million ABŞ dollaryna ýetdi. Has giň ulanylyş ugruna we ýokary bahalara eýe bolan doly göwreli adamşekilli robotlar 2025-nji ýylda umumy göwrümiň 41,6 göterimini eýeläp, bazarda iň uly paýa eýe boldular diýip, hasabatda aýdylýar.
Pudagyň analitikleri islegiň artmagy bilen täze gatnaşyjylaryň köp sanlysynyň peýda bolmagyna garaşýarlar.
«Biz has köp sanly üpjünçileriň, aýratyn hem önümçilik we üpjünçilik zynjyrynyň her iki ugrunda işleýänleriň peýda bolmagyna garaşýarys. Şeýlelikde, programma üpjünçileriniň, bulut hyzmatlaryny we komponentleri üpjün edijileriň bu işe barha uly goşant goşjakdygyny görýäris» diýip, “Omdia” kompaniýasynyň emeli aň boýunça baş analitigi Su Lian Sze belledi.
Ol robotlaryň önümçilikde we ambarlarda işçi güýjüniň ýetmezçiligini has azaltjakdygyny hem-de wagtyň geçmegi bilen adamlara niýetlenen şertlerde has näzik we çylşyrymly wezipeleri ýerine ýetirmek üçin kämilleşjekdigini belledi.
«Biz önümçilikde we ambar hojalygynda robotlaryň has giňden ornaşdyrylmagyna şaýat bolup başlarys, bu bolsa şol pudaklardaky işçi güýjüniň ýetmezçiligi meselesini çözmäge kömek eder. Men uzak möhletleýin geljekde robotlarymyzyň has kämilleşjekdigine ynanýaryn we şonda olary diňe adamlar üçin niýetlenen gurşawlarda hem-de häzirki ýerine ýetirýän işlerinden has näzik hem-de çylşyrymly wezipelerde ulanyp bolar» diýip, Su belledi.
