Ibindäki gala-konsert meýdançasy däpleri we döwrebap tehnologiýalary birleşdirdi
Syçuan welaýatynyň Ibin şäherinde Bahar baýramyna bagyşlanyp geçirilen goşmaça gala-konsert meýdançasynda sebitiň taryhy-medeni mirasyny we döwrebap tehnologiki gazananlaryny utgaşdyrýan şou görkezildi. Çäre «China Media Group» tarapyndan guralýan her ýylky gala-konsertiň çäklerinde geçirilip, ol bu ýyl Pekindäki esasy sahnadan başga-da dört sany goşmaça meýdançany öz içine alýar.
Ibin şäheri köpasyrlyk däp-dessurlaryň we häzirki zaman senagat ösüşiniň sazlaşýan ýeri hökmünde tanyşdyryldy. Bu şäher «Ýanszy derýasyndaky birinji şäher» hökmünde, şeýle-de adaty spirtli içgileriň önümçilik merkezi we dünýäniň iň uly bambuk tokaýlyklarynyň ýerleşýän sebiti hökmünde meşhurdyr. Soňky ýyllarda şäher elektromobiller üçin akkumulýator öndürýän möhüm merkez hökmünde hem tanaldy.
Meýdançada görkezilen takmynan sekiz minutlyk çykyşda Ýanszy derýasynyň kenaryndaky tebigy gözellikler we maddy däl medeni mirasyň bölekleri öňdebaryjy tehnologiýalaryň kömegi bilen utgaşdyryldy. Meýdançanyň esasy guramaçysy Gu Çžiganyň aýtmagyna görä, maksatnama Ýanszy derýasyny goramak bilen bagly ekologiýa temalary girizildi, suwuň üstündäki sahnanyň özi bolsa pes kömürturşy gazly ösüş konsepsiýasyny ilerletmegiň nyşany hökmünde ulanyldy. Çykyşda dronlar we derýanyň ýokary akymynda ýaşaýan hem-de ony goramaga gatnaşýan ýaşaýjylar hem orun aldy.
Maksatnamanyň esasy bölekleriniň biri suwuň ýüzünden takmynan 40 santimetr belentlikde hereket eden 5000 sany drondan emele getirilen delfiniň şekili boldy. Guramaçylar derýanyň üstündäki çylşyrymly howa akymlaryna we elektromagnit päsgelçiliklerine garamazdan, hereketleriň hakykylygyny üpjün etmegiň başardandygyny bellediler.
Sahnada şeýle-de sebitiň awiasiýa pudagynyň döwrebap ylmy gazananlary, şol sanda “Wing Loong-2” we “Cloud Shadow” kysymly uçarmansyz uçýan enjamlar görkezildi. Çendu awiasiýa senagat toparynyň uçarmansyz uçýan enjamlary işläp düzmek bölüminiň ýolbaşçysy Çžao Çuansiniň bellemegine görä, awiasiýa senagatynyň we sebitiň tebigy şertleriniň sazlaşygy pes belentlikdäki ykdysadyýeti ösdürmek üçin uly mümkinçilik döredýär.
Maksatnamada Ýanszy derýasynyň üstünden geçýän köpürdäki sahnalar hem görkezildi. Onda gadymy Çaý ýolunyň taryhy şekilleri häzirki zaman intellektual otlylary bilen deňeşdirildi. Panda robotlary Syçuanyň tebigy baýlyklaryny hödürledi, Muçuanyň otlardan ýasalan aždarhalary we Çuanbeý gurjak teatry ýaly maddy däl medeni mirasyň elementleri bolsa däp-dessurlaryň dowamatlylygyny dabaralandyrdy.
Gu Çžiganyň sözlerine görä, çykyşyň çeperçilik konsepsiýasy geçmiş bilen häzirki döwrüň arabaglanyşygyny aňladýar. Bölümleriň birinde gadymy ulag serişdesi bolan atyň şekili häzirki zaman intellektual ulag ulgamlary bilen simwoliki görnüşde utgaşýar. Bu bolsa geljege tarap hereketiň ideýasyny şöhlelendirýär.
Bu ýyl Ibinden başga-da, Hytaýyň dürli medeni we tehnologiki aýratynlyklaryny görkezýän Harbin, Iu we Hefuý şäherleri gala-konsertiň goşmaça meýdançalary boldy.
