Hytaýda salgydy dessine yzyna gaýtarmak ulgamy daşary ýurtly syýahatçylaryň söwda işjeňligini güýçlendirýär
Hytaý iri söwda merkezlerinde salgydy dessine yzyna gaýtarmak hyzmatlaryny giňeldip, daşary ýurtly syýahatçylar üçin söwdany ýeňilleşdirýär. Bu bolsa daşary ýurtly syýahatçylara goşulan baha üçin salgydyň öwezini ýurtdan çykmaga garaşman, şol ýerde almak mümkinçiligini berýär.
Bu ädim girýän syýahatçylygyň çägindäki sarp edişi höweslendirdi we salgydy yzyna gaýtarylmaga degişli harytlaryň satuwynyň has-da artmagyna getirdi.
Geçen ýylyň aprel aýynda işe girizilen hyzmat syýahatçylara karz beriş kartasynyň öňünden awtorizasiýa kepilligi bilen serişdeleri dessine yzyna almak mümkinçiligini berýär. Howa menzillerindäki kassalarda nobata durmagyň ýerine, alyjylar gatnaşýan söwda merkezlerindäki iň ýakyn hyzmat merkezine ýüz tutup, amaly birnäçe minutda tamamlap bilýärler.
Bu amatlylyk ylmy-tehnologiki gadjetler ýaly meşhur harytlary satyn almagy daşary ýurtly syýahatçylar üçin has-da özüne çekiji etdi. Bu ýagdaý Hytaýyň söwda şertlerini gowulandyrmak we olaryň ýurtda bolýan döwründe çykdajylaryny artdyrmak boýunça tagallalaryny görkezýär.
«Bu örän amatly», — diýip, Malaýziýaly syýahatçy Afizll aýtdy.
Resmi maglumatlara görä, 2025-nji ýylda daşary ýurtly syýahatçylar 82 milliondan gowrak sapary amala aşyrdy, bu bolsa öňki ýyl bilen deňeşdirilende 26,4% köpdir. Salgyt yzyna gaýtarylmaga degişli harytlaryň satuwy bolsa has çalt ösüş görkezdi we geçen ýyl bilen deňeşdirilende 95% artdy.
«Dessine salgydy yzyna gaýtarmak hyzmaty işe girizileli bäri, biziň dükanymyzda daşary ýurtly alyjylaryň çykdajylary her aý 5–10% artýar», — diýip, «China World Mall» söwda merkezinde ýerleşýän DJI kompaniýasynyň öndürýän dronlaryny satýan dükanyň dolandyryjysy Go Şaogan aýtdy.
«Dessine salgydy yzyna gaýtarmak syýasaty daşary ýurtly syýahatçylaryň sarp ediş mümkinçiliklerini açmaga kömek edýär, gaýtadan we hatda köp gezek satyn almagy höweslendirýär hem-de daşary ýurtly myhmanlaryň arasynda sarp edişi has-da işjeňleşdirýär», — diýip, Pekiniň salgyt gullugynyň bölüminiň başlygy Sin Týan aýtdy.
Hytaýyň Söwda ministrligi daşary ýurtly syýahatçylaryň sarp edişiniň umumy çykdajylaryň artmagynda möhüm ähmiýete eýedigini mälim etdi we salgyt yzyna gaýtarmaga hukugy bolan dükanlaryň sanyny artdyrmagy, şol bir wagtyň özünde hyzmatlaryň hilini ýokarlandyrmagy wada berdi.
