HHR-iň demir ýollary bahar syýahatlarynyň esasy döwrüniň 10-njy gününde takmynan 14 million ýolagça hyzmat eder
Çarşenbe güni, 40 günlik bahar baýramynda ýolagçy gatnatmagyň 10-njy gününde, Hytaý demir ýollarynyň takmynan 13 million 850 müň syýahatça hyzmat etmegine garaşylýar. Bu barada resmi çeşmeler habar berýär.
Hytaý Täze ýyly bilen baglanyşykly çunýun döwri dünýäde her ýylky uly göwrümli migrasiýa möwsümi hasaplanylýar. Milýonlarça adam ýakynlary bilen duşuşmak we Bahar baýramyny bellemek üçin ýurt boýunça syýahat edýärler.
Demir ýollaryň geçiriş kuwwatyny artdyrmak üçin goşmaça otlylar goýuldy. Çarşenbe güni ýolagçy hyzmatyna 1544 goşmaça otly çykarmak meýilleşdirilýär. Syýahatçylaryň sanynyň artmagy bilen, anna gününden başlap, agşamky ýokary tizlikli otly gatnawlarynyň hem sany artdy.
Hytaý demir ýollary toparynyň Wuhan şäherindäki Sýanýan lokomotiw deposynyň başlygynyň orunbasary Ge Sýuanguýyň habar berişi ýaly, täze agşamly otlylar üçin ýolagçylaryň wagtynda gelmegini üpjün etmek we iş düzgünlerine doly laýyklygy saklamak üçin öňünden giňişleýin howpsuzlyk çäreleri taýýarlanyldy.
Şol bir wagtyň özünde, ýaramaz howa şertleri awtomobil ýollarynda kyn ýagdaýlary döredýär. Çarşenbe güni irden sagat 7:00-a çenli gar we sürçek ýollar sebäpli Szilin, Guýçžou we Sinszýan welaýatlaryndaky awtoýollaryň ýedi böleginde çäklendirmeler girizildi. Galyň tuman Anhoý, Szýansi, Hubeý we beýleki sebitlerde takmynan 100 sany ýokary tizlikli ýol böleginiň ýapylmagyna ýa-da hereketiň çäklendirilmegine sebäp boldy.
Çaklamalara görä çarşenbe güni ýol hereketiniň has-da artmagyna garaşylýar.
Şeýle-de, bu ýyl Bahar baýramy 17 fewralda bellenýär. Resmi dynç alyş günleri 14-23-nji fewral aralygynda dowam eder, gatnawynyň ýokary derejeli döwri bolsa 2-nji fewraldan 13-nji mart aralygydyr.
