CMG-niň gala-konsertiniň wideoşekili Hytaýyň Islandiýadaky ilçihanasynda görkezildi
2026-njy ýyl üçin Hytaý media toparynyň (CMG) Bahar baýramy mynasybetli gala-konsertiniň mahabat wideoşekilI HHR-niň Islandiýadaky ilçihanasynda geçirilen Hytaý Täze ýylyna bagyşlanan kabul edişlikde görkezildi. Çärä gatnaşyjylar wideoşekil bilen birlikde Hytaýdan gelen professional sungat toparynyň çykyşyna hem tomaşa etdiler.
Kabul edişlige Islandiýanyň Premýer-ministriniň kanselýariýasynyň hemişelik sekretary Benedikt Arnason, Parlamentiň daşary işler boýunça komitetiniň başlygy Pawel Bartoşek, “Landsborg” gözleg-halas ediş assosiasiýasynyň wekilleri, Hytaýyň Islandiýadaky ilçisi He Rulun aýaly bilen, şeýle hem diplomatlar, jemgyýetçilik wekilleri, hytaý diasporasy we talyplar ýaly müňden gowrak myhman gatnaşdy.
Çäräniň dowamynda çykyş eden He Rulun geçen ýylda iki ýurduň arasyndaky gatnaşyklarynyň işjeň ösdürilendigini belledi. Ol 2026-njy ýylda Hytaý bilen Islandiýanyň arasynda diplomatik gatnaşyklaryň ýola goýulmagynyň 55 ýyllygynyň bellenjekdigini nygtap, hyzmatdaşlygy has-da çuňlaşdyrmaga we iki ýurduň ýolbaşçylary tarapyndan gazanylan ylalaşyklary durmuşa geçirmäge taýýardygyny mälim etdi.
Gala-agşamynyň wideoşekili häzirki zaman sahna tehnologiýalary, dürli žanrlar we çeperçilik çözgütleri arkaly ýagty baýramçylyk ruhuny döretdi.
Hytaýyň kömür känleriniň sungat toparynyň çykyşy hem maksatnamanyň üstüni ýetirdi. Artistler däp bolan hytaý elementlerini we günbatar sungatynyň görnüşlerini utgaşdyrýan çykyşlary hödürlediler. Biletleriň satuwyndan toplanan ähli serişdeler “Landsborg” assosiasiýasyna geçirildi.
Toparyň ýolbaşçysy Szin Dun wideoşekiliň Demirgazyk Ýewropada görkezilmeginiň aýratyn täsir galdyrýandygyny we sungat arkaly halkara tomaşaçylara Hytaýyň ösüşini görkezmäge mümkinçilik berýän möhüm medeni dialog kanaly bolup hyzmat edýändigini belledi.
Islandiýaly tomaşaçylar çärä ýokary baha berdiler. Kabul edişlige gatnaşan Anna çykyşlaryň onda Hytaý baradaky mähirli ýatlamalary oýandyrandygyny we hytaý medeniýetini has çuňňur duýmaga mümkinçilik döredendigini aýtdy. Islandiýa-hytaý medeni jemgyýetiniň ýolbaşçysy Ýokull Gislason bolsa çykyşy ajaýyp diýip atlandyryp, iki ýurduň arasynda göni howa gatnawlarynyň açylmagynyň olaryň ýakynlaşmagynda möhüm ädim boljakdygyny belledi.
Bahar baýramy — Hytaýyň esasy däp bolan baýramy bolup, Aý senenamasy boýunça Täze ýylyň başlanmagyny alamatlandyrýar. 2026-njy ýylda ol 17-nji fewrala gabat gelýär.
