Taýýuan howa menzili Bahar baýramynda köpçülikleýin syýahatlaryň iň gyzgalaňly döwründe howa gatnawlaryny güýçlendirýär
Fewral 08, 2026 | 20:17 |59
Bahar baýramynyň öňüsyrasynda Hytaýyň demirgazygyndaky Şansi welaýatynyň paýtagty bolan Taýýuan şäheriniň howa menzili ýolagçy akymynyň ep-esli artmagy bilen baglylykda hyzmatlary üpjün etmek üçin çäreleriň toplumyny girizýär.
40 gün dowam etjek syýahatçylyk möwsüminde (13-nji martyna çenli) howa menzili täze ugurlary açýar, öň togtadylan gatnawlary täzeden dikeldýär, möhüm ugurlar boýunça uçuşlaryň ýygylygyny artdyrýar hem-de has uly sygymly howa gämilerinden peýdalanýar.
Umumylykda, 18 täze ugry açmak, 12 gatnaw ugruny dikeltmek we takmynan 12 müň uçuşy amala aşyrmak meýilleşdirilýär. Bu döwürde 1,75 million ýolagça hyzmat edilmegi göz öňünde tutulýar. Ýurduň iň iri ulag merkezleri bolan Şanhaý, Şençžen, Guançžou we Çendu bilen howa gatnawy ep-esli giňeldildi.
Hyzmatyň hiline aýratyn üns berilýär. Ilkinji gezek uçýan ýolagçylara, şeýle hem kömege mätäç adamlara bellige alyşdan başlap münmäge çenli ähli tapgyrlarda ileri tutulýan kömek we goldaw berilýär.
Bu möwsümiň täze aýratynlygy halkara we sebitara gatnawlaryň işjeňleşmegidir. Taýýuandan Bangkok, Phuket, Nýaçang we Makao şäherlerine göni howa gatnawlary açyldy. Gonkong, Singapur we Kuala-Lumpur şäherlerine bar bolan ugurlar bilen bilelikde bu uçuşlar Hytaýyň demirgazygyny Günorta-Gündogar Aziýa bilen baglanyşdyrýan howa geçelgesini emele getirdi.
Her ýyl Bahar baýramy döwründe millionlarça adam dogduk şäherlerine dolanyp, dünýäde iň uly möwsümleýin ilat göçüşini emele getirýärler. Taýýuan howa menziliniň mümkinçilikleriniň giňeldilmegi ýurduň ulag ulgamynyň durnukly işlemegine möhüm goşant boldy.
