2025-nji ýylda Hytaýda içerki syýahat rekord derejä — 6,52 milliard sapara ýetdi
Anna güni Pekinde çap edilen hasabata görä, 2025-nji ýylda Hytaýda içerki syýahat rekord görkezijilere ýetip, umumylykda 6,52 milliard syýahat amala aşyryldy we bu ugurdan 6,3 trillion ýuan (takmynan 910 milliard ABŞ dollary) girdeji alyndy.
Pekindäki «Jinghe» Medeniýet we syýahat instituty anna güni gündizine 2025-nji ýyl üçin medeniýet we syýahat pudagy boýunça ýyllyk hasabatyny çap etdi.
Hasabata görä, 2025-nji ýylda şäherlere amala aşyrylan syýahatlaryň sany 14,3 göterim artyp, takmynan 5 milliarda ýetdi, oba ýerlerine amala aşyrylan syýahatlaryň sany bolsa 22,6 göterim köpelip, 1,53 milliard sapary düzdi.
Hasabatda sanly tehnologiýalaryň medeni-syýahat işlerine ornaşdyrylmagy, sport çäreleriniň syýahat bilen utgaşdyrylmagy, şeýle hem syýahatyň sagaldyş we dynç alyş bilen barha has ýakyndan baglanyşmagy ýaly täze ählumumy we içerki tendensiýalar beýan edilýär.
Bilermenler dürli ýokary tehnologiýaly çözgütleriň syýahat pudagyny özgertýändigini, syýahatçylaryň we kärhanalaryň dürli isleglerini kanagatlandyrýandygyny belleýärler.
«Wirtual we hakyky elementleriň birleşdirilmegi immersiw tejribeleriň ösüşindäki iň möhüm ugurlaryň biridir. Immersiw tejribeler indi diňe fiziki giňişlik bilen çäklenmän, dürli iş formatlaryna yzygiderli giňeýär. Häzirki zaman medeniýet we syýahat ulgamynda her bir myhmanyň emosional gymmatlygyny duýmak we hemişe üýtgäp durýan sarp ediji isleglerini kanagatlandyrmak örän möhümdir», — diýip, Hytaýyň Aragatnaşyk uniwersitetiniň Medeni senagaty dolandyryş mekdebiniň magistr maksatnamasynyň ylmy ýolbaşçysy Bu Sitin aýtdy.
«Medeniýet we syýahat pudagynyň ösüşiniň dowamynda köpçülikleýin habar beriş serişdeleri örän möhüm orun tutdy. Bir wagtlar birugurly aragatnaşyga gönükdirilen bu serişdeler esasan ýazga alyjy we güýçlendiriji hökmünde hyzmat edýärdi. Sosial media döwrüniň gelmegi bilen, meniň pikirimçe, platformalar diňe mazmuny ýazga almak we ýaýratmak guraly bolmakdan has giň gerime çykdy. Iň möhümi, olar medeniýet we syýahat pudagynda serişdeleri birleşdirmäge, utgaşdyrmaga, şeýle hem köp sanly brendleri döretmäge we ilerletmäge işjeň gatnaşyp başlady», — diýip, «Weibo» sosial ulgamynyň döwlet edaralary bilen aragatnaşyk boýunça baş menejeri Li Çženžun belledi.
