Hainanyň paçsyz söwda düzgünleri esasynda satuwlaryň möçberi bir aýda 10 mlrd ýuandan geçdi
Hytaýyň günortasyndaky Hainan welaýatynda paçsyz söwda düzgünleri güýje girizilenden soň bir aýyň dowamynda satuwlaryň möçberi 10 milliard 50 million ýuandan (ýagny, 1 milliard 450 million ABŞ dollaryndan) geçdi. Bu barada Haikou gümrük edarasy habar berdi.
Resmi maglumatlara görä, bu görkeziji 1 million 326 müň sany alyjynyň söwda amallaryny öz içine alýandyr. Satuwlaryň umumy möçberi geçen ýyl bilen deňeşdirilende 25.32 göterim artdy, alyjylaryň sany bolsa 1.84 göterim köpeldi. Bu görkeziji Hainan welaýatynyň paçsyz söwda bazarynda sarp edijileriň işjeňliginiň ýokarydygyny görkezýändir.
Bu gazanylan öňegidişlige rejelenen söwda düzgünleri esasy itergi berdi. Bu düzgün esasynda, paç tölemän satyn alyp bolýan harytlaryň görnüşleriniň sany 47-e ýetirildi hem-de ilkinji gezek ýerli öndürilen alty görnüşli önümleri salgytsyz satmaga rugsat berildi.
Şeýle hem, täze düzgün paçsyz söwda mümkinçiliginden peýdalanyp bilýänleriň gerimini giňeltdi. Indi Hainan adasynyň çäginden çykyp, daşary ýurda gidýän syýahatçylar hem bu ýeňilliklerden peýdalanyp bilýärler. Mundan başga-da, Hainan adasynyň çäginden bir ýylyň dowamynda azyndan bir gezek daşyna giden ýerli ýaşaýjylara şol ýylyň dowamynda çäklendirilmedik “satyn al – özüň alyp git” usulynda paçsyz söwda etmeklige rugsat berildi.
Gümrük edaralarynyň bellemegine görä, şeýle çemeleşmeler alyjylaryň mümkinçiliklerini artdyrmak bilen, sarp edijileriň bazarynyň ösmegine itergi berdi.
