Haýnan Erkin Söwda Portunyň ýörite gümrük düzgünleri ilkinji netijelerini berýär
Hytaýyň günortasynda ýerleşýän, meýdany boýunça dünýäniň iň uly erkin söwda porty bolan Haýnan Erkin Söwda Portunda, ýörite gümrük amallarynyň doly möçberde girizileninden bäri bir aýyň dowamynda işler yzygiderli we kadaly alnyp barylýar.
2025-nji ýylyň 18-nji dekabryndan bäri, gümrük paçlaryndan boşadylan import harytlarynyň möçberi, şeýle hem daşary söwda bilen meşgullanýan kärhanalaryň sany artdy. Haýkou gümrük gullugynyň maglumatlaryna görä, 2025-nji ýylyň 18-nji dekabryndan 2026-njy ýylyň 17-nji ýanwary aralygynda, “birinji hatar” boýunça gümrük paçlaryndan boşadylan import harytlarynyň gymmaty 750 million ýuana (ýagny 107 million ABŞ dollaryna) ýetdi. Gaýtadan işlenen we goşmaça gymmat döredilip, “ikinji hatar” boýunça içerki bazara satylan harytlaryň möçberi bolsa 85 million 900 müň ýuana barabar boldy. Şol döwürde 5132 sany täze daşary söwda bilen meşgullanýan kärhanalar hasaba alyndy.
Gümrük gözegçiligi astyndaky paçsyz söwdanyň möçberi 4 milliard 860 million ýuana ýetip, geçen ýyl bilen deňeşdirilende 46.8 göterim artdy. Alyjylaryň sany 30.2 göterim ýokarlanyp, 745 müň adama ýetdi, bu bolsa sarp edijiligiň ýokary derejede saklanýandygyny görkezýändir.
Syýahatçylaryň dürli isleglerini has gowy kanagatlandyrmak maksady bilen, 2025-nji ýylyň 1-nji noýabryndan Haýnan welaýatynda paçsyz söwda düzgünleri kämilleşdirildi. Paçdan boşadylan harytlaryň görnüşleri 45-den 47-ä ýetirildi, ýurda gidýän syýahatçylara hem bu ýeňilliklerden peýdalanmaga rugsat berildi. Bu çäreler halkara syýahatçylaryň sanynyň artmagyna itergi berdi.
2025-nji ýylyň 18-nji dekabrynda Hytaýyň Haýnan Erkin Söwda Portunda tutuş ada boýunça ýörite gümrük düzgünleri işe girizildi. Bu düzgünler daşary ýurt harytlarynyň erkin getirilmegine, gümrük paçlaryndan boşadylan harytlaryň sanawynyň giňeldilmegine hem-de işewürlik üçin amatly şertleriň döredilmegine mümkinçilik berýändir. Düzgünleriň esasy aýratynlygy – Haýnanyň halkara bazarlary bilen erkin söwdasyny kadalaşdyrýan “birinji hatar” gümrük amallarynyň ulanylmagy, şeýle hem Haýnandan Hytaýyň materik bölegine getirilýän harytlaryň söwdasyny kadalaşdyrýan “ikinji hatar” gümrük amallarynyň ulanylmagydyr.
