Täze ýyl baýramçylyk günlerinde ýolagçylaryň sany 20 göterime çenli artdy
Resmi maglumatlara görä, Täze ýyl baýramçylygy mynasybetli üç günlük dynç alyş döwründe Hytaýda sebitara gündelik ýolagçy gatnawlarynyň ortaça sany 198 milliona ýetip, geçen ýyl bilen deňeşdirilende 19.62 göterim artdy.
Hytaýyň Ulag ministrliginiň berýän maglumatlaryna görä, baýramçylyk günlerinde ýolagçy gatnawlarynyň umumy sany 595 milliona ýetip, syýahatçylyk isleginiň ýokary derejede saklanandygyny görkezdi.
Baýramçylyk günlerinde adamlar esasan awtomobil ýollary arkaly gezelenç etdiler. Bu ugur boýunça jemi 539 million ýolagçy gatnawy amala aşyrylyp, gündelik ýolagçy gatnawlarynyň sany geçen ýyl bilen deňeşdirilende 15.7 göterim ýokarlandy.
Demir ýol ulaglary batly depginde ösüşi görkezen esasy ulag görnüşleriniň biri boldy. Demir ýollary arkaly gündelik ýolagçy gatnawlary ýyllyk 52.66 göterim artdy. Baýramçylygyň ilkinji gününde demir ýollary arkaly gatnaýan ýolagçylaryň sany 18 million 560 müňe ýetip, bu görkeziji geçen ýyl bilen deňeşdirilende 67.9 göterim ýokarlandy.
Mundan başga-da, gämiler we raýat awiasiýasy arkaly ýolagçy gatnawlarynda hem ösüş hasaba alyndy.
“Baýramçylyk günlerinde syýahat edýän adamlaryň sanynyň köpelmegi syýahatçylyk merkezlerinde, myhmanhanalarda, dynç alyş ýerlerinde, şeýle-de ýörite önümleriň satuwynda öňegidişlik bolup, şäher we oba ýerleriniň ykdysadyýetiniň ösüşine itergi berdi we bu ugurda Hytaýyň işjeň ýagdaýyny görkezdi,” diýip Ulag ministrliginiň Ulag hyzmatlary bölüminiň direktorynyň orunbasary Sin Minlun gürrüň berdi.
Hepdäniň ýekşenbe güni Hytaýyň Medeniýet we syýahatçylyk ministrliginiň beren maglumatlaryna görä, üç günlük baýramçylyk döwründe ýurt içinde gezelenç eden raýatlaryň jemi sany 142 million adama ýetip, syýahatçylykdan alnan umumy girdejiler 84 milliard 800 million ýuana (ýagny 12 milliard 100 million ABŞ dollaryna) barabar boldy.
Ministrlik gyş möwsümine degişli syýahatçylyk ugurlarynyň, ýyly sebitlere syýahatçylygyň we ýakyn aralykdaky gezelençleriň baýramçylyk döwründe has köpelendigini, söwdalaryň bolsa ýokary derejede saklanandygyny belledi.
Milli immigrasiýa edarasynyň maglumatlaryna görä, üç günlük baýramçylyk döwründe Hytaýda serhetüsti gatnawlaryň sany 6 million 610 müňden geçdi. Serhetüsti gatnawlaryň ortaça gündelik sany geçen ýyl bilen deňeşdirilende 28.6 göterim ýokarlandy.
Maglumatlara görä, Hytaýyň materik böleginiň 3 million 365 müň ýaşaýjysy syýahatçylyk edip, geçen ýyl bilen deňeşdirilende 39.1 göterim artdy. Gonkong, Makao we Taýwan sebitlerinden jemi 2 million 422 müň ýaşaýjy syýahatçylyga çykyp, geçen ýyl bilen deňeşdirilende 15.9 göterim köpeldi.
Baýramçylyk günlerinde daşary ýurtly syýahatçylaryň serhetara gatnawlary 2025-nji ýyl bilen deňeşdirilende 29.8 göterim ýokarlanyp, 828 müňe ýetdi. Hytaýa giren daşary ýurtly syýahatçylaryň 292 müňüsi wizasyz tertipde kabul edilip, bu görkeziji geçen ýyl bilen deňeşdirilende 35.8 göterim artdy.
