Hytaý ilkinji 52 sany milli uglerod zyňyndysyz senagat parklaryny döretmegi meýilleşdirýär
Anna güni Hytaýyň Milli ösüş we özgertmeler boýunça topary (NDRC) «ýaşyl» özgeriş merkezlerini ösdürmek we ýurduň uglerod zyňyndylaryny azaltmak boýunça maksatlaryna ýetmek tagallalaryny goldamak maksady bilen gurulmagy meýilleşdirilýän ilkinji 52 sany milli uglerod zyňyndysyz senagat parklarynyň sanawyny hödürledi.
Uglerod zyňyndysyz senagat parklary toplumlaýyn meýilnamalaşdyrma, taslama, tehnologiýalar we dolandyryş arkaly önümçilikden hem-de gündelik işlerden uglerod zyňyndylaryny nol derejesine çenli azaltmagy maksat edinýär. Şeýle-de bu parklaryň geljekde doly uglerodsyz derejesine ýetmek mümkinçiligine eýe bolmagyna garaşylýar.
«Adynda “uglerod zyňyndysyz” diýlip atlandyrylmagyna garamazdan, şeýle senagat parklarynyň maksady dolulygyna zyňyndysyz derejesine ýetmek däl. Standart häzirki bar bolan senagat parklarynda energiýa sarp ediliş birligine düşýän ortaça uglerod zyňyndylarynyň takmynan onda birine çenli peseltmekden ybaratdyr. Degişli şertleri we taýýarlygy bolan parklarda uglerod zyňyndylarynyň öwezini dolmak ýaly gurallaryň üsti bilen uglerodsyz derejesine ýetmek mümkin», — diýip, NDRC-niň Milli energiýa tygşytlaýyş merkeziniň direktorynyň orunbasary Kan Ýanbin belledi.
Geografik taýdan ilkinji taslamalaryň sanawy Hytaýyň ähli 31 sany welaýat derejesindäki sebitini, şeýle-de Sinszýan önümçilik-gurluşyk korpusyny öz içine alýar. Bu bolsa her bir sebitde azyndan bir saýlanan parkyň bolmagyny üpjün edýär.
«52 park esasan az energiýa sarp edýän, az hapalaýjy we ýokary goşmaça gymmatly täze energiýa pudaklarynyň klasterlerine gönükdirilendir. Muňa täze energiýa enjamlarynyň önümçiligi, öňdebaryjy enjamlaryň önümçiligi we hasaplaýyş merkezleri girýär. Esasy üns arassa energiýany ulanyp, ekologik taýdan arassa önümleri öndürmäge gönükdirilýär», — diýip, NDRC-niň Energetika gözleg institutynyň direktorynyň orunbasary Li Çžun aýtdy.
Bu parklar ýerli ýel we Gün energiýa çeşmelerinden doly peýdalanar we ýerli şertlere laýyklykda arassa elektrik energiýasynyň göni üpjünçilik modellerini ösdürer. Parkyň umumy elektrik sarp edişiniň azyndan 50 göterimi göni täzelenip bilýän energiýa çeşmelerinden üpjün edilmelidir. Bu bolsa ýaşyl elektrik şahadatnamalarynyň söwdasy arkaly satyn alnan energiýa bilen doldurylar. Gurluşyk döwri tamamlanandan soň diňe resmi barlaglardan geçen parklar milli uglerod zyňyndysyz senagat parklary hökmünde ykrar ediler.
«Uglerod zyňyndysyz derejesi diňe bir şygar däl. Parklar arassa energiýanyň göni üpjünçiligini ilerletmek, energiýa saklaýyş infrastrukturasyny döretmek ýaly anyk ädimleri ätmelidir. Bu bolsa gazylyp alynýan ýangyçlardan alynmaýan energiýanyň paýyny ep-esli artdyrmaga we doly peýdalanylmaýan täzelenip bilýän energiýa önümçiligi meselesini çözmäge mümkinçilik berer», — diýip, Kan aýtdy.
