Hytaýyň maliýe edaralarynyň umumy gymmatlyklary 8.7 göterim artdy
Hytaýyň maliýe edaralaryna degişli umumy gymmatlyklaryň möçberi 2025-nji ýylyň üçünji çärýeginiň ahyryna çenli 531 trillion 760 milliard ýuana (ýagny 75.66 trillion ABŞ dollaryna) ýetdi. Bu görkeziji geçen ýylyň degişli döwri bilen deňeşdirilende 8.7 göterim ýokarydyr. Bu barada hepdäniň anna güni ýurduň Merkezi banky bolan Hytaý Halk banky tarapyndan çap edilen statistika maglumatlarynda aýdylýar.
Maglumatlara görä, maliýe ulgamynda iň uly paý bank pudagyna degişli bolup, onuň gymmatlyklary 474 trillion 310 milliard ýuana (ýagny 67.48 trillion ABŞ dollaryna) ýetdi. Bu bolsa geçen ýyl bilen deňeşdirilende 7.9 göterim ösüşi görkezýär. Gymmatly kagyzlar edaralarynyň gymmatlyklary 17 trillion 50 milliard ýuana (ýagny 2.43 trillion ABŞ dollaryna) ýetdi we 16.5 göterim ösüş görkezdi. Ätiýaçlandyryş pudagynyň gymmatlyklary bolsa 40 trillion 400 milliard ýuana (ýagny 5.75 trillion ABŞ dollaryna) barabar bolup, ösüş derejesi 15.4 göterim boldy.
Şol bir wagtyň özünde, Hytaýyň maliýe edaralarynyň umumy borçnamalarynyň möçberi 485 trillion 850 milliard ýuana (ýagny 69.13 trillion ABŞ dollaryna) ýetip, bu görkeziji geçen ýylky derejeden 8.8 göterim ýokary boldy.
Pudaklar boýunça seredilende, bank ulgamynyň borçnamalary 435 trillion 950 milliard ýuana (ýagny 62.03 trillion ABŞ dollaryna) barabar boldy we 8 göterim ýokarlandy, gymmatly kagyzlar pudagynyň borçnamalary 13 trillion 250 milliard ýuana (ýagny 1.89 trillion ABŞ dollaryna) ýetdi we 19.2 göterim artdy, ätiýaçlandyryş pudagynyň borçnamalary bolsa 36 trillion 650 milliard ýuana (ýagny 5.21 trillion ABŞ dollaryna) barabar boldy we 15.3 göterim köpeldi.
